inatsisartuni oqallinneq
Sara Olsvig: Nunarput partiilersuunnermut imminut nerivoq
Illuatungiliuttut siuttuat, Sara Olsvig (IA), partiimi siulittaasutut ilanngussaqarnermini politikkikkut suleqatigiilluarnissamik qinnuiginnippoq
- Nunarput partiilersuunnermut imminut nerivoq. Partiilersuunneq annertooq Inatsisartuni sulinermi takusarparput.
Inatsisartut ukiaanerani ataatsimiinneranni Sara Olsvig (IA) oqalugiaqqaarnermini taama oqaaseqarpoq.
- Suliassat kivitseqataaffigissagutsigit illuatungiliuttuusugut tusarnaarneqarlutalu peqatigineqartariaqarpugut. Ajortussarsiuinnarluta apeqquteqarumaneq ajorpugut. Suliassat ajunngittumik naammassiumallugit tamatta maani sulivugut.
Assigiinnginneq ajunngitsuuvoq
Olsvigip 'kattuffiit suliniaqatigiiffiillu arlallit' partiilersuunneq akiorniarlugu partiilersuunnertaqanngitsumik ingerlajumalersimammata nersualaarpai.
Aasaanerani ilaatigut Demokraatininngaanniit Inuit Ataqatigiit saassunneqaqattaarnertik qatsuppaa.
Isummat assigiinngitsut pitsaasuusoq ammaanersiornermi oqalugiarnermini oqaatigaa.
- Nunarput siuarsassagutsigut assigiinngissutsivut ataqqillugillu atorluarlugit ingerlasariaqarpugut. Qalipaat apeqqutaatinnagu suliap imarisai salliutitsigit.
Atuaruk: Kielsen: Aaqqissuusseqqinnerit artornartut atussavavut
- Assersuutigalugu inuiaqatigiit akornanni inoqatinut nipimut atorneqartumut iluaqutaangaarnavianngilaq partiit ilaat avammut oqaaseqarnitik tamangajaasa partiimik allamik ingussinertalertassagunikkit.
- Sulinitsinni inerisimanerusariaqarpugut. Nukiit sumut atussanerlutigit eqqarsaatigilluartigu, Sara Olsvig oqarpoq.