Sara Olsvig: Meeqqanut akilersuutit atorunnaarsinneqarnerat aaqqiissutissaanngilaq

Qeqqata Kommuniani kommunalbestyrelsi meeqqanut akilersuutinut peqqussutip atorunnaarsinneqarnissaanik kaammattuilluni Naalakkersuisunut tallimanngornermi ammasumik allagaqarput.

Allakkanik tigusisoq, Isumaginninnermut Naalakkersuisoq, Sara Olsvig (IA) isumaqarpoq, inatsisartut peqqussutaata atorunnaarsinneqarnissaa ajornartorsiummik aaqqiissuutaanavianngitsoq, meeqqanummi akilersuutit eqqartuussivikkut aalajangerneqartarmata.

Kisianni oqaluttuaraa, Naalakkersuisut tamatumunnga ilisimaarinnittut, ajornartorsiullu iliuuseqarfiginiarlugu arlalinnik suliniuteqartoqartoq.

Aamma atuaruk: Qeqqata Kommunia: Meeqqanut akilersuutinut peqqussut atorunnaarsinneqarli

Inatsisissatut siunnersuut Ilanngaassivik

Meeqqanut akilersuutit amerliartuinnarnerat pillugu, Isumaginninnermut Naalakkersuisoq, Sara Olsvig (IA) Naalakkersuisut inatsissatut siunnersuutissaat kinguartinneqarsimasoq, Ilanngaassivik, tikkuarpaa.

Aamm atuaruk: Ilanngaatitseriaaseq akerlerineqartoq taamaatinneqartoq

- Naalakkersuisut inatsisissatut siunnersuutissaq akiliisitseriaatsimut tunngasut Ilanngaassivik suliarileruttorpaat, innuttaasut pisortanut akiitsuinik ikilisaatitut atorneqassalluni, Sara Olsvig (IA) oqarpoq.

Qanimut ilitsersuillunilu ikiorsiineq

Aammattaaq taanna isumaqarpoq, innuttaasunut pisortanut akiitsullinnut ilitsersuisoqarnerullunilu ikiorsiisoqarnerusariaqartoq.

- Siullertut pingaartippara innuttaasut pisortanut akiitsullit akiitsuisa akilerneqarnissaannik ilitsersuillunilu ikiorsiisoqartariaqartoq, Sara Olsvig, Sermitsiaq.AG-mut oqarpoq.

Tassunga tunngatillugu Ini A/S-ip Kommune Kujallerlu suleqatigiillutik ineqarnermut akiitsunik ikilisaaniarlutik innuttaasunut pineqartunut ilitsersuillutillu siunnersuisimanerat eqqaavaa.

- Isumaqarpunga, suleriaatsit taama ittut amerlanerusariaqartut, Sara Olsvig naqissusiivoq.

Tunngavik misissorneqartariaqartoq

- Meeqqanut akilersuutit pillugit sooq taama amerlatiginersut misissortariaqarparput, suna tunngaviunersoq soorlu taamaannersoq, Isumaginninnermut Naalakkersuisoq oqarpoq, ajornartorsiummullu iliuuseqartoqartariaqartoq isumaqarpoq.

Nangippoq:

- Siusissukkut ataatassarsiuisarnerup ingerlanneqartalernissaanut pikkoriffiginerusariaqakkatta ilagaat. Qulakkiissavarput, angajoqqaanngortussanut tamanut, inooqatigiippata inooqatigiinngippataluunniit siusissukkut suliniuteqarfiginissaat. Tamanna Naalakkersuisut sulissutigaarput. Naggataagummi ataataasoq meeqqaminik meeqqaminilluunniit najorunnaagaqarsinnaavoq, tassanilu qulakkiissavarput amerlasuunik meeqqanut akilersuutinit akiligassaqalernissaat, Sara Olsvig oqarpoq.