Isumaginninnermut politikki

Sara Olsvig: Lars-Emil Johansenip isornartorsiuinera assuarnarpoq

Naalakkersuisut suliassaqarfinnillu agguataarineq Inatsisartunut akuersissutigineqarnikuummat Inatsisartut siulittaasuata ataqqinerusariaqaraa Inuit Ataqatigiit siulittaasuat isumaqarpoq

Naalakkersuisut suliassaqarfinnillu agguataarineq Inatsisartunut akuersissutigineqarnikuummat Inatsisartut siulittaasuata ataqqinerusariaqaraa Inuit Ataqatigiit siulittaasuat isumaqarpoq

Lars-Emil Johansenip partiip siulittaasuanut Kim Kielsenimut ukiarmi naalakkersuisunik nikisitsisimanera pillugu Sermitsiaq aviisimi tallimanngormat saqqummertumi isornartorsiuisoq allaaserineqarpoq.

- Partiitsinnit akisussaaffeqarfiit pingaarutillit ingerlalluartullu, soorlu isumaginninnermut aamma aalisarnermut naalakkersuisoqarfiit, partiinut allanut tunniussuunneqarnerat isornartoqartippara, Lars- Emil Johansen Sermitsiamut oqarpoq.

Atuaruk: Lars-Emil Johansenip Kim Kielsen isornartorsiorpaa

IA: Isornartorsiuineq assuarnartoq

Inuit Ataqatigiit suliassaqarfinnut Isumaginninnermut, Ilaqutariinnut, Naligiissitaanermut Inatsisinillu Atuutsitsinermut akisussaasuusut Lars-Emil Johansenip isornartorsiuinera assuarnartippaat.

-Inatsisartut siulittaasuata Naalakkersuisooqatigiit katitigaanerannik akisussaaffinnillu agguataarinnissimanerannik isornartorsiuinera Inuit Ataqatigiit pissusissamisuunngitsutut isigaarput. Naalakkersuisut suliassaqarfiillu agguataarneri Inatsisartunit taasissutaanikuupput Inatsisartullu siulittaasuannit tamanna ataqqineqarnerusariaqarpoq, Inuit Ataqatigiit siulittaasuiat Isumaginninnermullu, Ilaqutariinnut, Naligiissitaanermut Inatsisinillu Atuutsitsinermut Naalakkersuisuutigisoq Sara Olsvig tusagassiuutinut nalunaarummi allappoq.

Inuit ataqatigiit suliassaqarfik taannarpiaq pingaarnerpaatillutigu naalakkersuisooqatigiilernermi nuna tamakkerlugu isumaginninnikkut pinartumik inissisimasoqarmat piumasarisimallugu erseqqissarpaa.

- Pingaartinneqarnera qaffakkumallutigu politikkikkullu erseqqinnerusumik sammivilerumallutigu isumaginninnermut suliassaqarfik tiguarput, Sara Olsvig oqarpoq.

Atuaruk: Immikkoortoqarfik: Piviusunngortitsisinnaannginneq Kim Kielsenip siulittaasuuneranik akeqarsinnaavoq

Naligiinnerulerneq

Inuit Ataqatigiit naalakkersuisooqataalernerminni partiitut isumaginninnermut naalakkersioqarfimmut akisussaasuunissartik aalajangiussimavaat namminiilivinnissamullu aqqummi, inuiaqatigiinni atukkatigut naligiinnerusumik atugaqalernissaq qulakkeerniarlugu.

- Pingaartitarput tassaavoq inuttut atukkatigut qaffaanikkut naligiinnerusumillu atugaqalersitsilluta nunatta ineriartortinneranut namminiilivinnissaanullu nunaqqatigiit akornanni tamattaalluta kivitseqataasinnaanissarput, Sara Olsvig tikkuartuivoq suleriaatsillu eqqaasai ukiuni kingullerni amigaataasimanerarlugit. Taamaammat Inuit Ataqatigiit isumaginninnikkut sullisseriaaseq nutaajunerusoq ingerlakkumallugu naalakkersuinerullu iluani isumaginninnermik pingaartitsinerunissaq anguniarlutigu suliassaqarfik tigusimanerarpaat.

Atuaruk: Siumumi maanna saqqumiinnartumik assortuupput

Pissaanerqarniunnermut akuliukkusunngilaq

Suliassaqarfiit 'eqqarsaatigilluakkamik toqqagaapput' Sara Olsvigip naqissuserpaa.

- Naalakkersuisooqatigiinni partiitut angisuutut suliassaqarfiit tamaasa naalakkersuinikkullu ingerlatsineq annertuumik sunniuteqarfigaarput. Suleqatigiinnerlu nuannaarutigaarput.

- Siumup iluani pissaaneqarniunneq akuleruffigissanngilarput Inuit Ataqatigiinnulli siulittaasutut erseqqissumik oqaatigissavara Inatsisartut siulittaasuata (Lars-Emil Johansen aaqq.) eqqoriaalluni piumasaqaateqanngitsumik suleriaaseqarsimanermik pasilliinera sakkortunerpaamik utertittariaqarakku.

Atuaruk: Kielsen Lars-Emilimit qoqassineqartutut misigivoq

'Ataqqinninnerugit'

Inatsisartut siulittaasuata naalakkersuinikkut akisussaaffinnik agguataarinnissimanermut Inatsisartullu taasinermikkut naalakkersuisunik suliassaqarfiillu inuttalersorneqarnerinik toqqaasimanerinut ataqqinninnerussasoq kaammattuutigaa.

- Inatsisartut siulittaasuata tulluarissagaluarpaa nammineq partiimini tukattuliornerit nunatta inatsisartuisa siulittaasuattut inissisimanerminut akulerutinngikkaluarunigit, Inuit Ataqatigiit siulittaasuat naggasiivoq.

Lars-Emil Johansenip Kim Kielsenimut isornartorsiuinera pillugu sapaatip akunnerani uani Sermitsiami saqqummertumi atuarsinnaavat. Aviisi uani pisiariuk:

Powered by Labrador CMS