FN-ip ullorititaa

Sara Olsvig: Innarluuteqarnermut tunngasuni pitsaassutsimik qaffaaviussaaq

FN-ip nunarsuaq tamakkerlugu inunnut innarluutilinnut arfininngorpat ullorititarissavaa

FN-ip nunarsuaq tamakkerlugu inunnut innarluutilinnut arfininngorpat ullorititarissavaa

Ukiuni aggersuni innarluutilinnut tunngatillugu amerlanerusunik suliniuteqartoqassaaq.

Isumaginninnermut, ilaqutariinnermut, naligiissitaanermut inatsisinillu atortitsinermut naalakkersuisoq, Sara Olsvig (IA), FN-ip nunarsuaq tamakkerlugu innarluutilinnut ullorititaa sioqqullugu oqarpoq. Ulloq aqagu arfininngornermi malunnartinneqassaaq.

- Ukioq 2017 ukiuussaaq innarluuteqarnermut tunngasuni pitsaassutsimik qaffaaviussaaq. Nuna tamakkerlugu inunnut innarluutilinnut sullissivik ammarneqassaaq, Namminersorlutik Oqartussanit tusagassiuutinut nalunaarummi, Sara Olsvig oqarpoq.

Pisinnaatitaaffiit
Ukioq manna FN-ip Ataatsimeersuarnermini inuit innarluutillit pisinnaatitaaffii pillugit FN-ip isumaqatigiissutaa ukiunik qulinngortorsiornera nalliuttorsiutigineqassaaq.

- Inuit innarluutillit inuit pisinnaatitaafiinik illersugaanissaat allatullu kiffaanngissuseqarnermut tunngaviusumik pisinnaatitaaffinnik atuisinnaanerat kiisalu taakku pinngortitaassutsimikkut ataqqineqarnerisa siuarsarnissaanik isumaqatigiissut qularnaarinnittuuvoq, Namminersorlutik Oqartussat allapput.

Isumaqatigiissutillu nunarsuarmioqatigiit isumaqatigiissutaasa akornanni qaqutigoortumik sukkasuumik naalagaaffinnillu amerlanernit atuutilersinneqarnera immikkoorutigaa. Ullumikkut nunat 147-t isumaqatigiissut atortussanngortereerpaat. Kalaalit Nunatsinnilu 2009-mili atuuppoq.

Powered by Labrador CMS