kingulerunneq
Sara Olsvig: Inatsiseqarnermut susassaqarfimmi aaqqiipallattarnerit taamaatittariaqarput
Maanna inatsiseqarnermut susassaqarfimmut danskit aningaasanut inatsisaanni ukiuni sisamani tulliuttuni 10 millionit koruuninik immikkoortitsisoqarnera, Sara Olsvigip nuannaarutigaa. Kisianni ataavarnerusumik aaqqiissuteqartoqarnissaanik ujartuivoq.
Inatsiseqarnermut susassaqarfimmi kivitsisoqarnissaa aappaagumut aningaasanut inatsisissami isumaqatigiissutigineqarpoq. Ukiuni sisamani tulliuttuni tamatumunnga saniatigut 10 millionit koruuninik aningaasaliisoqarpoq. Tamatuma saniatigut pineqaatissinneqarsimasut inissiisarfiini nakkutilliisut ilinniaqqinnissaannut 1 million koruuninik aningaasaliisoqarpoq.
- Soorunalimi taakku aningaasaliissutigineqarnerat pitsaavoq, kisianni tamatuma saniatigut Nunatsinni inatsiseqarnermut suliassaqarfinni kinguleruttoorneq annertooq angummaffigissagutsigu naammanngitsoq oqaatigisariaqarpara, Sara Olsvig (IA) oqarpoq, taanna inatsisinik atuutsitsinermut naalakkersuisuuvoq.
Siullermik justitsiministeriap tungaanit ataqatigiinnerusumik periuseqarnissamik ujartuivoq, neriorsuutigineqartutut qanoq ililluni Kalaallit Nunaanni inatsiseqarnermut suliassaqarfiup Danmarkimisut pitsaassusseqalernissaa anguniarlugu.
- Saniatigut aningaasaliissuteqarfigineqarnera naammanngilaq. Justitsministeriap aamma tamatuminnga sulineq salliutinnerusariaqarpaa, taamaalilluni suliassamik isumaginninneq pitsanngorsarneqassammat.
Atuaruk: Illersuisunik ilinniartitsinissaq suli qularnaateqarpoq
Kingullermik taanna naalakkersuisoqarfimmini inatsiseqarnermut suliassaqarfimmut periusissiamik suliaqarpoq, taanna Naalakkersuisut danskit naalakkersuisuinut nassiuppaat. Taanna atorlugu justitsministeri Søren Pape Poulsenilu (K), iliuuseqarnerup ataqatigiinnerusup qanoq isikkoqarsinnaanera oqaloqatigiissutiginiarpaat.
- Suliassaqarfiup aaqqiipallaffigilaaginnarneqartarnera taamaatittariaqarpoq, Sara Olsvig (IA) oqarpoq.
Januarimi sapaatip-akunnerisa aappaanni taassuma Søren Pape Poulsen naapissavaa. Suliassaqarfimmi Naalakkersuisut periusissiaat tassani oqaloqatigiissutiginiarpaa. Tamatuma saniatigut taakku 10 millionit koruunit qanoq pingaarnersiuiffigineqassanersut oqaloqatigiissutigissavaat.
- Siusinnerusukkut justitsministeria nalunaarfigereerpara, illersuisut ilinniartinneqarnissaat salliutinneqartariaqartoq. Kisianni tamatumunngaannaq saniatigut 6 millionit koruunit atorneqartussaapput, tamatumalu 10 millionit taakku naammaannartut naqissuserpaa.
Kommunefogedit amigaataanerat aamma danskit kalaallillu politiit Nunatsinni akissarsiaasa assigiinnginnerat iluarsiivigineqartariaqartut ilaminiinnarigaat, taanna isumaqarpoq. Kingullermik aamma meeqqat videokkut killisiorneqartarnerannut utaqqisariaqartarnerup sivisuallaarnera oqaluuserineqarnikuuvoq.
Atuaruk: Videokkut killisiuisarnermut utaqqisarneq sivikillineqassaaq
- Aammaarlunga naqissusertariaqarpara kinguleruttooqqaneq qaangissagutsigu annertuumik ataqatigiissaartumik iliuuseqartoqartariaqarpoq. Danskit naalakkersuinermik suliaqartuisa tamanna akisussaaffik tigussagaat kajumissaarutigaara.