qinersineq
Sara Olsvig IA-p qinersisoqarnerani nalliuttorsiorneranut kingusissukkut takkuppoq
Inuit Ataqatigiit qinersisoqarneranut atatillugu Nuummi Inussivimmi nalliuttorsiorpoq. Partiip siulittaasua kingusissukkut takkuppoq
Nipilersortoqarpoq, inuit nuannaartut qittattullu. Kaffinik, te-nik, immiaaqqanik pisisoqarsinnaavoq. Kimmernaq nipilersortorineqarpoq.
- Sara Olsvig, Aqqaluaq B. Egede aamma allat qinigassanngortittut Katuap eqqaani ulapputeqarnikuupput ullumi. Taakkununnga ulloq takivoq taamaattumik angerlarsimaffimminni eqqissisimaaqqaarallarput. Qinersinerup inernera paasinarseriarpat takkukkumaarput. Qinigassanngortittut ilaat aamma ilaquttatik ilagalugit unnussiornissartik soqutigineruaat, IA-mit Storm Ludvigsen Sermitsiaq.AG-mut nalunaaqutaq 23.00-ip missaani oqarpoq.
IA Siumumit naleqqiullugu taasisukinnerugallarpoq.
Taanna pillugu Storm Ludvigsen ima oqarpoq:
- Ernumanngilagut. Nunaqarfinni Siumut nuannarineqarneruvoq. IA nunaqarfinni aatsaat siuarsaalluni aallarteruttorpoq. Isumalluarpunga. Unnuk suli takeqaaq, Storm Ludvigsen nassuiaavoq.