Aleqap atornerluinera
Sara Olsvig: Aleqap unioqqutitsinera Inatsisartuni oqaluuserineqassaaq
– Inatsisartut Kukkunersiuinermut Ataatsimiititaliamit saaffigineqarsimapput Naalakkersuisut siulittaasuat inatsisinik unioqqutitsisimasoq. Tamanna qisuariarfigisariaqarparput, Inuit Ataqatigiit siulittaasuat Sara Olsvig oqarpoq
– Aleqa Hammondip landskarsip aningaasaataanik atornerluisimaneranik nutaamik misissuisoqarnissaanik eqqunngitsumik oqarnerup Inatsisartuni oqaluuserineqarnissaa kinguartissanngilaa, Inuit Ataqatigiit siulittaasuat Sara Olsvig oqarpoq.
– Isumaqarpugut pisimasoq ima erloqinartigisoq Inatsisartuni piaarnerpaamik oqaluuserisariaqarlutigu. Taamaattumik qinnutigissavarput Kukkunersiuinermut Ataatsimiititaliap saaffiginnissutaa ataatsimiinnermi ullormi siullermi, tassa marlunngorpat, Inatsisartuni oqaluuserineqassasoq.
Sapinngisamik piaarnerpaamik
– Maanna Doris Jakobsen (Siumumeersoq, aaqqiss.) oqarpoq Kukkunersiuinermut Ataatsimiititaliaq amerlanerusunik misissuissasoq. Naalakkersuisulli siulittaasuata misissuiffigineqarnera naammassereerpoq. Taamaattumik qaqutigoorluinnartumik Inatsisartut Kukkunersiuinermut Ataatsimiititaliamit isumaqatigiissumit erloqinartorujussuarmik saaffigineqarpoq, tassani ersarissumik allassimalluni Aleqa Hammond inatsisinik unioqqutitsisimasoq. Kukkunersiuinermut Ataatsimiititaliap misissussavaa Naalakkersuisunut ilaasortat allat aamma landskarsip aningaasaataanik namminerminnut atuisimanersut, tamannali suliassaq allaavoq.
– Suli isumaqarpunga pisimasoq ima erloqinartigisoq sapinngisamik piaarnerpaamik Inatsisartuni oqaluuserineqartariaqarluni, Sara Olsvig oqarpoq, tikkuarlugulu Kukkunersiuinermut Ataatsimiititaliap allanik misissuineratigut Naalakkersuisut siulittaasuata Aleqa Hammondip inatsisinik unioqqutitsisimanerata Inatsisartuni oqaluuserineqarnissaa kinguartissanngikkaa.