qulimiguulik
SAR qulimiguulik Air Greenlandip taamaatikkaa
S-61 qulimiguulik Air Greenlandip 2015-mi SAR-inut atungassiatut pisiarisimasaa taamaatinneqarpoq
Maajip qaammataani KNR-ip Air Greenlandip S-61 qulimiguuliutaa SAR-imut atungassiaq ajoquteqangaarmat tamaviat isaterneqartariaqartoq allaaserinnippoq.
Massakkut Air Greenlandi allappoq, qulimiguulik 2015-mi 16,9 mio koruunilerlugu pisiarisimasartik taamaatillugu.
- Aalajangerneq oqitsuinnaasimanngilaq, kisiannili niuernikkut naliliineq tunngavigalugu aaqqiissut tamanna pitsaanerpaavoq, siulersuisuni siulittaasoq Søren Lennert Mortensen tusagassiuutinut nalunaarummi allappoq.
Atuaruk: SAR qulimiguulik uninngasoq
Billetsinut akigititanut sunniuteqassanngitsoq
Sikorsky qulimiguulik, qulimiguulik Air Greenlandip taamaatiinnangaanit taarserneqartussaangaluaq massakkut SAR-inut atungassianngorlugu piareersarneqaleruttortoq, Air Greenlandip ilanngullugu paasissutissiaraa.
- Suliniutip naammassineqarnera ukioq manna annaasaqaataassaaq, kisianni annaasaqaatip annertussusissaanut qulimiguullip qanoq naleqarnera apeqqutaassaaq, kingoraartissamaatit qanoq annertutigisut atoqqinneqarsinnaanersut aamma suut tuniniarneqarsinnaanersut apeqqutaallutik, pisortaanerugallartoq Jacob Nitter Sørensen tusagassiuutinut nalunaarummi allappoq.
- Taamaattumik erseqqinnerusumik aningaasat annertussusilerneqarnissaat maanna siusippallaarpoq, aqutsisuniilli piginnittunut aamma sullitatsinnut erseqqissumik oqaatigerusupparput ukiumut angusassat suli naammaginartuussammata, aamma bilitsinut akit sunnerneqarnavianngimmata. Uagut aqutsisutut suliassarput pingaarnerpaaq tassaavoq qulakkeerinninnissaq, pisortaangerugallartoq oqarpoq.