naalakkersuisunngortoq
Saqqummiunneqarpoq: Erik Jensen naalakkersuisunngorpoq
Ilimagineqareersutut Erik Jensen Siumumeersoq kommuninut, nunaqarfinnut, isorliunerusunut, attaveqarnermut ineqarnermullu naalakkersuisunngorpoq. Taassuma Martha Lund Olsen taarserpaa.
Erik Jensen kommuninut, nunaqarfinnut, isorliunerusunut, attaveqarnermut ineqarnermullu naalakkersuisunngorpoq.
Naalakkersuisut siulittaasuata, Kim Kielsenip, aatsaannguummat Nunatsinni tusagassiorfiit ullup ingerlanerani eqqoriaqattaarsimasaat uppernarsarmagu tamanna paasinarsivoq. Inatsisartut upernaakkut ataatsimiinnerisa ammaanersiorneqarnerata kinguninngua tusagassiortunik katersortitsinermi tamanna nalunaarutigaa.
Angut eqeersimaartoq
41-nik ukiulik Erik Jensen Nunatsinni politikkikkut siuariangaatsiartoq, Martha Lund Olsenip akisussaaffigisimasaanik akisussaaffeqalersoq eqeersimaartorujussuuvoq. Politikkikkuinnaanngitsoq, aamma Sisimiuni peqatigiiffilerinermi.
Atuaruk: Erik Jensen anngigisalik: Nuummiippunga
Timersortartuuvoq assammik isikkammillu timersoqatigiiffik SAK-mi arsartartuuvoq, tassanilu aamma sungiusaasuulluni.
- Koncertinut tunngatillugu aamma timersoqatigiiffitsinni SAK-mi qanimut suleqatigiinnikooqaagut. Suliumatuujuvoq, inoqatiminullu ikiuukkumatooq, Malik Berthelsen oqaluttuarpoq.
Qaqortumi niuernermik ilinniarfik
Aningaasaqarnermut tunngasunik Qaqortumi Niuernermik Ilinniarfimmi ilinniarsimavaa, maannakkullu Ini A/S-imi Sisimiuni attaveqaqatigiinnermut immikkoortoqarfimmi sulisuuvoq, tassani nulianilu panitillu pingasuusut, tallimanik, qulinik aamma 20-nik ukiullik najugaqatigiipput. Siornatigut suliffeqarfimmi tassani controlleritut pisortatut atorfeqarsimavoq.
Atuaruk: Martha Lund Olsen ajorsarnertik pillugu: Inernerit naammaginanngitsut
2015-imi folketingimut qinersinermi Siumumit siullermeerluni qinigassanngortippoq, tassanilu 1.348-nit taaguunneqarpoq, taakkulu taasinerit tamarmik 6,5 procenteraat.
Tamatuma kingorna februaarimi 2016-imi Sisimiuni Siumup immikkoortuani siulittaasunngorpoq. Taanna kommunalbestyrelsimut qinigaaqqammerpoq, tassanilu issianngitsuulerpoq.
Taaguunneqarnerpaat tullia
Kommuninut qinersinermi naammasseqqammertumi Siumumit qinigassanngortittuni 438-nit taaneqarluni taaguunneqarnerpaat tulliuvoq, borgmesterinngortumit Malik Berthelsenimit taamaallaat qaangerneqarluni.
Nuna tamakkerlugu Siumup siorna ataatsimeersuarnerani qularineqanngilaq, politikeri taanna siunissaqartoq.
Mute B. Egede, Martha Lund Olsenip naalakkersuisutut soraarsitaanerata kingorna tassani akisussaasuusimasoq, aatsitassalerinerinnarmik sammisaqarnissaminut qilanaalereersinnaavoq.