Saqqummersitsineq kulturikkut kingornussassarsianik oqallitsitsisoq

Kulturikkut kingornussarsiat pineqartillugit ineriartortitsineq isummallu assigiinngitsut inissaqartinneqassapput. Taama atisanik haute couturenik ilusilersuisartoq, Jørgen Simonsen, kalaallisuut isumassarsiorfigalugit atisanik assigiinngitsunngorlugit ilusilersukkanik tallimanik pilersitsisimasoq, isumaqarpoq.

Saqqummersitaq Nunatta Katersugaasiviani marsip 26-ata tungaanut takuniarneqarsinnaavoq. Tamatuma kingorna ingerlaartinneqassaaq Sisimiunut, Reykjavikimut, Tórshavnimut, Stockholmimut, Oslomut, Karasjokimut aamma Norgep avannaani Porsangerimut, Helsinkimut, Københavnimut, Struerimut (Jørgen Simonsenip illoqarfittut najugaanut) aamma Parisimut

- Assassukkat kulturikkullu kingornussarsiat soorunami attanneqassapput. Kisianni nutarterisoqanngippat ineriartortoqarnavianngilaq. Ineriartortitsisoqartariaqarpoq, pingaartumik inuit kulturiat mikisunnguummat. Pissutsit taamaatsiinnarlugit aalajangiusimaneqarpata naggataatigut piuneerutissapput. Tamanna arlalippassuariarluni takuneqartarsimavoq.

Atisanik haute couturenik ilusilersuisartoq tusaamasaq Jørgen Simonsen, NAPA-mit saqqummersitaq Sermip kunngiata pania ammariartorlugu januaarimi Kalaallit Nunaanniittoq oqarpoq.

Suliniummi, Sermip kunngiata pania vol. II – kulturikkut kingornussaq piujuaannartitsinermi, anguniarneqartoq tassaavoq taaguutigitinneqartumit ilimanarsisinneqartutut, nunat tamalaat akornanni ilusilersuisartoq qangatut ilusilersukkanit, soorluni kalaallisuunit, isumassarsisinneqaraangata pisartunik isiginninniarnissaq.

Tamanna kulturimut isumassarsiorfigineqartumut aarlerinartuua? Kulturikkut kingornussarsianut piginneqartussaanermik pigisaqartoqarsinnaava? Innimiilliorfiginninnerua? Imaluunniit nersorinnissutaava nittarsaassinikkut nalilerujussuaq?

Taamaattumik ammaanermut atatillugu suliniut pillugu ajornartorsiutillu tunuliaqutaasut pillugit oqallitsitsisoqarpoq.

Jørgen Simonsen saqqummersitsinermut tassunga atisanik ataatsimoortunik tallimanik, imaluunniit ilusilersuisartut akornanni silhuettenik taaneqartartunik, ilusilersuisimavoq.

- Neriuppunga kalaallisuunik ataqqinnilluni suliaasimanerat inuit takusinnaagaat. Siunnersuummik saqqummiussisimavunga. Taava pigiliunneqarsinnaavoq imaluunniit sussakkeerneqarsinnaalluni, oqarpoq

Kalaallit Nunaanni suliffeqarfiit arlallit suliniummut tamatumunnga akuusimapput, ilaatigut Great Greenland, mersortarfik Kittat aamma Sisimiuni Kalaallisuuliornermik Ilinniarfik.

Kalaallit mersortartut marluk pikkorissut ilusilersuisartoq suleqatigisimavaat. Hansignaaraq Petersen Kittaneersoq sapangaaqqanik sungiusimasaminit allaanerulluinnartunik nuilarmiuliorsimavoq:

- Aallaqqaammut isumaqarsimagaluarpunga nuilarmiuliorneq pisariillunilu pilertornassasoq, kisianni kukkorujussuarpunga. Sapangaaqqat sulissutigalugu allaaneroqaat. Allatorluinnaq ajornarnerusumillu passunneqartariaqarput. Kisianni qujanartumik naggataatigut iluatsippoq.

Arnanut nutaaq saqqummertoq atuaruk, taanna uani pisiarisinnaavat:

Powered by Labrador CMS