Saqqummersitat naasunik pupinnillu ilisimasaqarnerulissutigissavatit

Nunatta Atuagaateqarfia Nuummiittoq aasaq manna saqqummersitsivoq naasunik, paarnanik pupinnillu katersinissamut piareersarnermut iluaqutaasussatut siunertaqartumik.

Naasorpassuit pupippassuillu

Saqqummersitani pupiit sorliit nerineqarsinnaanerannik nerineqarsinnaannginnerannillu qanorlu iliorluni nassaarineqarsinnaanerannik assiliartaliussarpassuit allaaserisallu isiginnaarneqarlutillu atuarneqarsinnaapput

Aamma kuannit, tullerunnat, engkarsit, qajaasat, paarnat, kigutaarnat kiisalu naasut paarnallu allat qanoq isikkoqarnerat ilinniarneqarsinnaavoq.

Kalaallit Nunaanni naasunik ilikkagaqarnerunissamut atuakkiaqarpoq arlalinnik kalaallisut, qallunaatut tuluttullu allanneqarsimasunik.

Quppersagaararlu najoqqutassianik imalik Nunatta Atuagaateqarfigiani pisiarineqarsinnaasoq iluaqutigalugu naasut paarnallu katersatit imaaliallaannaq atorsinnaalissavatit.

Saqqummersitat septembarip aallaqqaataata tungaanut takuniarneqarsinnaapput.

'Nerisassat Pinngortitameersut' Sermitsiaq.AG-mi qaammammi sammisatut qulequtarineqarpoq. Aggustimi pingaarnerutinneqartut tassaapput nerisassat pinngortitamiittut tamanit pissarsiarineqarsinnaasut - Allaaserisat tamaasa maani atuakkit

Allaaserisassamik siunnersuutissaqaruit Facebookimi allaffigisigut imaluunniit uunga netredaktionen@Sermitsiaq.AG