Saqitsaattoqareersoq: Nunatta arfartassiissutinut qinnuteqaatai IWC-p akuersissutigai

- Naammagisimaarluinnarpara isumatusaarluni eqqarsartarneq kiisami IWC-mi ajugaasimammat taamaaliornikkullu qulakkeerneqarluni ukiuni tulliuttuni sisamani Kalaallit Nunaata imartaani arfernik aqutsineq iluaquteqarnerlu naapertuuttumik ilisimatuussutsikkullu tunngavilimmik ingerlaannassammat. Angusap aamma takutippaa nunanik allanik suleqateqarluni anguniagaqarneq aqqutissaasoq. Nunat EU-mi ilaasortat IWC-mut ilaasortat suleqatigisimaneri qujamasuutigaara.

Aalisarnermut, piniarnermut nunalerinermullu naalakkersuisoq Finn Karlsen, Siumut, tusagassiutinut nalunaaruteqarpoq.

Arfanniarnermut isumaqatiginninniarnerni Kalaallit Nunaat Danmarkilu ataqatigiillutik Arfanniarnermut Ataatsimiititaliarsuarlu isumaqatigiinngissuteqarnikuupput.

Sloveniamili Arfanniarnermut Ataatsimiititaliarsuup ataatsimiinnerani Kalaallit Nunaata piumasaqaataat isumaqatigiissutigineqarput.

IWC-mi amerlanerussuteqarluartoqarluni, tapersersuisut 46, akerliusut 11-k aamma taaseqataanngitsut pingasut, ukiunut tulliuttunut sisamanut - 2015-imiit 2018-imut - arfattassiissutissanut Kalaallit Nunaata siunnersuutaa akuersissutigineqarpoq, Finn Karlsen ilisimatitsivoq.

- Pisassiissutinit sinneruttunik ukiumiit ukiumut nuussisarnermut maannamut malittarisassat ingerlaqqiinnarput. Pisassiissutit siuliini taaneqartut tamarmik ilisimatuussutsikkut ataatsimiititaliap kaammattuutaanik tunngaveqarput. Piumasaqaat kalaallit piumasaqaataasa akornanni qitiulluinnarsimasoq. Pisassiissutissat tullissaanik isumaqatigiinniutigeqqinneqassapput 2018-imi, Finn Karlsen oqarpoq.

IWC-imi ataatsimiinnerit septembarip 11-anit 18-ata tungaanut ingerlanneqassapput.

Kitaanut:

• Tikaagulliit 164-it
• Tikaagulliusaat 19-it
• Qipoqqaat qulit
• Arfiviit marluk

Tunumut:

• Tikaagulliit aqqaneq marluk