Aalisarneq
Sapaatiuppat aalisakkat tunfiskit Nuup umiarsualiaviani takusinnaavatut
Tunumi avaleraasartoorniarnermi aaliakkat tun-it angisoorsuit pisarineqarsimasut ilaat sapaatiuppat ullaakkut Royal Greenlandip Nuup umiarsualiaviani takutissavai
Royal Greenlandip kilisaataa Tuugaalik sapaatiuppat ullaakkut Nuup umiarsualivianut tikikkuni tun-inik tungujortunik naparualinnik 20-nik nassassaaq, Tunumi avaleraasartoorniarnermini pisarisimasaminik.
Tunit tungujortunik naparutallit marluk-pingasut umiarsualivimmut niuneqassapput akunnerullu ataatsip missaani isiginnaartinneqassallutik, Nuummiunut taakkuninnga takunnikkusuttunut, taamatut paasissutissiivoq royalgreenland.gl.
Suli ilisimaneqanngilaq tun-it 20-t qanoq pineqassanersut. Royal Greenlandip kilisaataatai tun-inik, 60 gradinik nillertigisumi qeritinneqartussanut, qerititsisinnaanngillat, tamakkualu qeritereerlugit 40 gradinik nillertigisumi uninngatinneqartussaapput, Royal Greenland allappoq.
Aalisagaq ammalukullaammat meterip affaanik silissusilik, Royal Greenlandip kilisaataataasa arlaanniluunniit qeritinneqarsinnaanngilaq. Taamaattumik nerillugu ulorianarsinnaavoq. Aalisakkat aallaqqaammut bakteriaqarneranik misissorneqassapput, tuniniarneqassagaluarpata, Royal Greenland allappoq.