Sapaatit akunnerini tulliuttuni issikkallassaaq

Kalaallit Nunaata silaannaa allanngorartorujussuusarpoq. Avannaani, kujataani kitaani kangianilu sila assigiinngitsorujussuusarpoq.

- Kalaallit Nunaata avannaani kangianilu piffissap ilaani nalinginnaasumik kianneruvoq. Ittoqqortoommiini kangianilu januaarimi agguaqatigiisillugu 9,8-nik issippoq, nalinginnaasumik agguaqatigiisillugu 16,1-mik issittaraluartoq, DMI-mi meteorologi Jesper Eriksen oqarpoq, nangillunilu:

- Sumiiffinnili allani issippoq. Tamanna Kalaallit Nunaata Kujataani Kalaallit Nunaatalu Kitaani malugineqarsinnaavoq. Agguaqatigiisillugu issittarnerasut decembarimi inissisimavoq kisianni januaarimi februaarimilu nalinginnaasumit issinneruvoq - sivikitsuinnarmik sila kiannerulaartarpoq.

Kalaallit Nunaata kitaani kujataanilu agguaqatigiisillugu nalinginnaasumik marlunnik pingasunilluunniit issinneruvoq januaarimi.

Aasianni agguaqatigiisillugu 15,3-nik issippoq, nalinginnaasumik 13,4-mik issittaraluarpoq. Nuummi aamma nalinginnaasumit issinneruvoq. Agguaqatigiisillugu 10,7-nik issippoq, nalinginnaasumik 7,4-mik issittaraluartoq. Qaqortumi nalinginnaasumik 5,5-mik issittaraluartoq januaarimi agguaqatigiisillugu 8-mik isseqarpoq.

Naqitsiniisaffiup pissutigisaanik issittoq
- Kujataani kitaanilu nalinginnaasumik issinneruneranut naqitsiniisaffik pissutaavoq, Jesper Eriksen oqarpoq.

Silap issikkallarnissaa Jesper Eriksenip naatsorsuutigaa.

- Naqitsiniisaffiup uninnganerata pissutigisaanik sila suli sapaatit akunnerini marlunni pingasuniluunniit issikkallassasoq naatsorsuutigaara. Sivikitsumik sila kiannerulaalersinnaavoq, oqarpoq.

Nuummi sikusinnaasoq
- Issinnerujussuata pissutigisaanik Davisstrædemi sikunera annertunerulerpoq. Sisimiuni Maniitsumi Nuummilu sikuneq ajorpoq. Royal Arctic Linep umiarsuakkut pilersuinera ajornanngitsumik ingerlasaraluarpoq ukioq kaajallallugu, DMI-mit Jens Jakobsen oqarpoq, nangillunilu:

- Januaarimi februaarimilu issinnerujussuata pissutigisaanik sikunera annertusiartorpoq. Sisimiut Maniitsullu eqqaani nalinginaasumit sikuuneruvoq.

DMI suleqatigalugu allaaserineqartoq ilanngunneqarpoq. Allaaserineqartoq dmi.dk-mi aamma atuarneqarsinnaavoq Mogens Rønnebekimit allaaserineqarluni. Februaarip 25-ani allaaserineqartoq saqqummiunneqarpoq