Birna Bjránsdóttir

Sapaatip-akunnerisa sisamat ingerlanerini eqqartuussivimmi aalajangiisoqassasoq

Ilisimannittut nassuiaanerat naammassineqarpoq. Unnerluussisisup illersuisullu suliamik immikkut nassuiaateqassapput

Reykjavikimi eqqartuussivimmi uppernarsaatit tamarmik saqqummiunneqareerput.

Ilisimannittunik killisiuineq Nunatsinni nalunaaqutaq malillugu qulinut naammassineqarpoq.

Illersuisup aamma unnerluussisussaatitaasut suliassaat kiserngorupput. Tassani ulluni sisamani eqqartuussisoqarnerani uppernarsaatit saqqummiunneqartut pillugit immikkut nassuiaateqassapput.

Tamatuma kingorna eqqartuussivik sapaatip-akunnerini sisamani aalajangiinissamut periarfissaqassaaq, ruv.is taama allappoq.

Ullumi ilisimannittut nassuiaateqarneranni suliami aalajangiisumik nutaamik saqqummertoqanngilaq.

Misissuinermi pisortaq Grímur Grímsson illersuisumit Páll Rúnar Kristjánssonimit isornartorsiorpalaartunit arlalinnik aperineqarpoq, mbl.is taama allappoq.

Ilaatigut 30-nik ukiullip T-p politiinit qanoq pineqarsimanini maalaarutigisimavaa.

T-p Birna Bjránsdóttir toqussimagaa nalunagu, killisiuinermi politeeq oqarsimavoq.

Tamanna eqqortumik killisiuinerunngitsoq, Grímur Grímssonip nassuerutigaa.

Powered by Labrador CMS