Sapaatip akunnerata naanerani Nuummi pisoqarfiungaatsiassaaq

Arfininngornermi sapaammilu annertuunik sisamanik Nuummi pisussaqarpoq. Arpannerit marluussapput, Gay Pride-qassaalluni aammalu Katuam quiasaarisoqassalluni.

Aaqqissuusinerit arfininngornermi nalunaaqutaq ataatsimut aallartissapput Brugsenip arpartitsinerani tassani toqqarneqarsinnaallutik 10 kilometerimut unammineq imaluunniit ilaqutariit 3,5 kilometerimut arpannerat. DMIp silamik ilimasaarutaa malillugu arfininngornermi seqinnertussaavoq sakkukitsuinnarmik anoreqassalluni.

Pinnatassat arlaqarput arpannerup kingorna makitsinermi agguaanneqartussat. Pinnatassat annersaraat Air Greenlandimi pisissutissaq 5.000 koruuninik nalilik. Neqimit savaaraq ilivitsoq pinnatassiissutigineqarpoq aammalu immeruersaasiorfik Unibrew sodavandinik karsimik pinnatassaqartitsilluni. Brugsen aamma 200 koruunit naligannut pisissutissamik pinnatassaqartitsivoq.

Atuaruk: Pisiniartartut arpaatilersorput

Gay Pride quiasaarisullu
Imaassinnaavoq arpattut ilaat suli apuutinngitsut pisussap tullia aallartittoq tassa Gay Pride aallartillugu nalunaaqutaq marlunut kulturip illorsuata Katuap silataaniit ingerlaaqatigiittoqartussaammat. Ukiut tallimassaa suiaassuseqatiminnik atoqateqartartut katerisimaarnerat Gay Pride pissaaq tamannalu malunnartinniarlugu atuagaq ’Inuugatta – Fordi vi lever’ saqqummersinneqassaaq tassanilu suiaassuseqatiminnoortut inuunertik oqaluttuaraat.

Atuaruk: Atuagaq nutaaq: Suiaqatiminnoortut inuunertik oqaluttuaraat

Katuap silataani aamma nipilersortoqartarumaarpoq Gay Pridelu naggaserlugu unnukkut imerniartarfimmi Manhattanimi nuannanneqassaaq.

Arfininngornermi unnukkut Katuami nalunaaqutaq arfineq pingasup qeqqa aamma pisussaqarpoq quiasaarineq ’Quiasutta’ takutinneqassammat quiasaarisartut Piitannguaq Alaufesen aamma Marie Mathiassen quiasaarissammata. Quiasaarutigineqartussat ilagaat zumbartunik quianartunngortitsineq.

Atuaruk: Quiasaarisut: Avannaata Qimussersuaq arnaasanngortoq

Pisussat sapaammi ingerlaqqissapput nalunaaqutaq aqqanermut qaqqamut arpanneq Nuuk Mountain Challenge siorna 100-ut missaannit peqataaffigineqartoq pissammat. Toqqagassaapput Quassussuup qaavanut imaluunnit Ukkusissat qaavannut arpannerit. Siorna Ukkusissanut arpannermi ajugaasoq Martin Møller ukiormanna peqaasussaanngimmat nutaamik ajugaasussarsisoqartussaavoq, paasinarsiumaarporlu ajugaasussap siorna Martin Møllerip atugaa 51,29 minutter angusinnaajumaarneraa.

Atuaruk: Qaqqami arpatsitsinissamut Nuuk piareerpoq