Monday, March 20, 2017 - 14:08

Sapaatip akunnerani sukkalisaarpallaat 29-t politiit unitsippaat

Assi.: Leiff Josefsen
Akiligassat katillugit 67.500 koruunit sapaatip akunnerani kingullermi akiligassiissutigineqarpoq, tassani politiit Nuummi biilertunik misissuivoq.

Politiit naak siusinaarlutik illoqarfiit pingaarnersaanni innuttaasut sukkassutsimut killigitinneqartut maleqqullugit mianersoqqusereeraluartut, biilertut marluk sukkalisaangaaramik unioqqutitseqqikkunik biilinik ingerlatsisinnaanermut allagartaannik arsaarneqartussanngorput.

Kukkuluttornerit allat
Kisianni aamma angallannermi kukkuluttornerit akiligassiissutigineqarput. Sukkalisaarnermut akiligassat saniatigut politiit makku nalunaarsorsimavaat:

  • Marluk meeqqatik pingasut ataallugit ukiullit iluamik biilinik aalajangersimanngimmatigit akiligassinneqarput
  • Ataaseq sangunermini ussersunnginnami akiligassinneqarpoq
  • Marluk ingerlanerminni mobilikkut oqaluttut akiligassinneqarput
  • Ataatsip ingerlatsisinnaanermut allagartani puigorsimavaa
  • Ataaseq ingerlatsinermut allagartaqanngilaq
  • Ataatsip ingerlatsisinnaanermut allagartani annaareernikuusimavaa

Politiit akuttuallaanngitsumik taamaatut misissuisarput, tamannalu pinaveersaartitsissutaasussaavoq, Nuummi politiineersoq Mads Lynge ilisimatitsivoq.

2016-imi sukkalisaarpallaartut 42-t
2016-imi biilertut 42-t sukkalisaarpallaartut nalunaarsorneqarsimapput. Kisitsisit Kalaallit Nunaat tamakkerlugu atuupput.

Seneste nyheder / Nutaarsiassat kingulliit