Sanaartugassanik suliarinnittartut mittarfissanut alakkaatinneqarput
Kalaallit Airportsip Ilulissanut aamma Nuummut sanaartugassanik suliarinnittartut piukkunneqartut timmisartoqarfissani nutaani mittarfinnut takusaatillugit angalaqatigai.
Sanaartugassanik suliarinnittartut ataatsimoortukkaat arfinillit taakkua, Ilulissani, Nuummi aamma Qaqortumi mittarfissanut sanaartornermik suliassanut aamma sanaartorfissagissaanermut neqerooruteqarnissamut siusinnerusukkut piukkunnartussarsiuussinermi piukkunneqartut, ulluni ulloq 9. apriilimit 11. apriilimut Ilulissanut aamma Nuummut takusaatillugit angalaqatigineqarput.
Kalaallit Airports tusagassiuutinut nalunaarummi taama allapput.
Nunat assigiinngitsut tallimat
Angalanermi peqataasut Canadameersut, Danmarkimeersut, Islandimeersut, Hollandimeersut aamma Kinameersut, sumiiffiit suliaqarfiusussat aammalu sanaartornermi teknikkimut tunngasut nammineq takullugit paasisaqarfiginiarlugit, timmisartoqarfiit eqqaanni suliassat sumiiffiinut takusaapput.
- Suliffeqarfinnut, ilinniarfinnut oqartussanullu najukkameersunut attaveqalernerit pinerat nuannaarutigaarput neriuutigaarpullu taamaaliornikkut entreprenørinit neqeroorutinik suli pitsaanerusunik unammillersinnaassuseqartunillu tigusaqarsinnaanerput tunngavississimallugu aammalu suliffeqarfiit, ilinniarfiit oqartussallu najukkameersut sanaartornermik suliassani annertunerusuni taakkunani akuutinneqarsinnaanerannut tunngavissiisimassalluta, Kalaallit Airportsimi pisortaaneq Steffen Ulrich-Lynge, tusagassiuutinut nalunaarummi oqarpoq.
Kingusinnerpaamik aggustimi
Mittarfissanut pingasunut taakkununnga sanaartornermik suliassat ingerlanneqarnissaannut sanaartugassanik suliarinnittartunik naggataatigut toqqaanermi, neqeroorutit 2018-imi aggustimi tunniunneqartussat aallaavigineqartussaapput, ingerlatseqatigiiffik ilisimatitsivoq.
Kingusinnerusukkut, aalaruluttarnernut misissuinerit annertunerusut aamma sanaartugassanut pilersaarusiorneq ingerlanneqartut naammassereerpata, aamma Qaqortumut takusaalluni angalaneq ingerlanneqassaaq.
Mittarfissat pingasut tamarmik 2022-imi ukiaanerani atorneqalernissaat pilersaarutigineqarpoq.
Kalaallit Airports pillugu allaaserisat amerlanerusut uani atuakkit