tapiissut
Sanaartornermut akitsuutip Siorarsiorfimmut aqqut aningaasalersussavaa
Siunissami sanaartugassanut akitsuummik nutaamik atuutsitsisoqalerneratigut illoqarfiup immikkoortuanik Siorarsiorfimmik takoorluugaq piviusunngortinneqassaaq. Ukkusissakkut sullorsuaq imaluunniit eqqaatigut aqqusineq akitsuutip ilaatigut akilissavaa.
Qinngutsinnit Ukkusissakkut sullorsuaq 450-init aamma 500 millionit koruunit missaanni akeqarnissaa nalilerneqarpoq. Aningaasartuutissat taakku sissaq sinerlugu qaqqap sinaatigut aqqusinnioraanni annertuumik ikilisinneqarsinnaapput. Akikinnerummat suliarineralu sivikinnerussammat, qinikkat qularnanngitsumik taanna toqqassagunarpaat.
Attaveqaatinut tapiissut
Aqqusinniortoqaraluarpalluunniit sanaartornerup akia millioninik pingasunik kisistsisitalinnik akeqassaaq. Suliniummut akissaqarniarluni kommunimi sanaartornermut akitsuusiinissamut siunnersuuteqarpoq. 2018-imut missingersuutit akuerineqarneranut atatillugu tamanna aalajangerneqassaaq.
Akitsuut ''attaveqaatinut tapiissummik'' taaguuteqassaaq.
Ingerlatsiviup akitsuutup annertussusissaa aalajangiussimanngikkaa, Sermitsiaq.AG-p tusarpaa, kisianni sanatitsisup kvadratmeterimut ataatsimut 100 aamma 400 koruunit akornanni akilertassavaa. Tamannalu inissianut imaluunniit suliffeqarfimmik sanaartornermi atuutissaaq.
Akimut assersuut
Inissiaq 100 kvadratmeterisut angissusilik 10.000-it aamma 40.000 koruunit akornanni saniatigut akeqassaaq. Aningaasat taakku inissiamik sanaartorluni suliniummik, katillugu tuniniarnerani 2 millionit koruunit missaanik akeqartumut uppisitsinavianngitsoq sanaartornermut ingerlatsivik isumaqarpoq.
Aamma atuaruk: Illoqarfiit pingaarnersaani pilersaarummut aningaasat 1 milliardid Kommuneqarfik Sermersuup ima nassaarissavai
- Attaveqaatinut akitsuut sullorsuarmut imaluunniit aqqusinermut kisimi aningaasaliissanngilaq. Ukiuni aggersuni nuttartussarpassuit naatsorsuutigineqartut inissaqartinnissaat qulakkeerneqassappat, aqqusinernut pilersinneqartussanut pisariaqartunut aamma qulakkeerinneqataassapput, kommunimi pisortaaneq Lars Møller-Sørensen nassuiaavoq.
Mittarfimmut aqqut
Nuummi mittarfiup tallineqarnissaa aqquserniornissamik pisariaqartitsissasoq assersuutigineqarsinnaavoq, tamanna 103 millionit koruuninik akeqassangatinneqarpoq. Aningaasartuut Kommuneqarfik Sermersuumi akilerneqartussaq.
Aamma atuaruk: Pilersaarutip nutaap Nuummi sumiiffiit 37-t allanngortissavai
Aamma atuaruk: Illoqarfimmut pilersaartut taamaammat agguarneqassaaq