efter Tuapannguit-faldulykke
Sanaartornermi maleruagassat sukaterneqartut
Siunissami erseqqissumik paatsoorneqarsinnaanngitsumillu allassimassaaq sanaartukkat iigaannit aneerasaartarfit sinaakkutaasa imminnut akuttussusissaat. Taamaaliortoqassaaq nakkarnernik ajunaarnerit Nuummi pisutut ittut pinaveersaartinneqarnissaat
Kalaallit Nunaanni sanaartornermi malittareqqusani allassimanngilaq aneerasaartarfinnut ikerit qanoq annertutiginissaat. Inatsisilli sukateriffiginiarneqarput taakkua 2014-imi atuutilernissaat naatsorsuutigineqarluni.
- Ukiorpassuarni 12 centimeteri annertunerpaamik ikiliutaasinnaasoq innersuussutigineqartarpoq. Taanna 1982-imi sanaartornermi maleruaqqusani allassimavoq 2006-imili malittarisassat allanngortiterneqarmata toqqaannartumik taaneqarsimagani. Sanaartornermi sulialinnit maleruagassaq taanna ilisimaneqarpoq, Ineqarnermut, Avatangiisinut Pinngortitamullu Pisortaqarfimmi sektionsingeniør Janus Køster Sermitsiaq.AG-mut oqarpoq.
Inissiaatileqatigiiffiit Illuut A/S aamma sanaartornermik ingerlatsivik Permagreen A/S Tuapannguani inissiarsuarnik sanaartornermik ingerlatsisut maanna aneerasaartarfiit illersorneqarsinnaasumik sanaartorneqarsimanersut misissuinermik ingerlatsipput.
2014-imi sukaterisoqassaaq
Namminersorlutik oqartussani maannakkut sanaartornermi maleruagassat nutaat piareersarlugit ingerlanneqarput 2014-imi atuutilernissaat naatsorsuutigineqarlutik.
Iikkamit silarlermit aneerasaartarfiit assiutaannut siullermut ikerup 17 centimeteriunera Nuummi Tuapannguani nukappiaqqap ataatsimik ukiullip sap. ak. siuliani tallimanngornermi 6. salimit nakkarneranut pissutaavoq. Nukappiaraq suli Dronning Ingridip napparsimavissuani uninngavoq.