Salloqittagaavit?
Salloqittaavik: Apriilip aallaqqaataani salloqittaanerit
Danskit aviisiisa saqqummiussaat ullumi tamaasa upperisariaqanngillat. Salloqittaavimmi suut ilaatigut allaaserineqarnersut takukkit
Arlaannik pisoqariasaassappat ullumi marlunngornermi uppereqqissaartariaqanngilat. Apriilip aallaqqaataani salloqittaavimmi danskit aviisiisa ulloq atorluavippaat.
Aviisip Ekstra Bladet-ip allaaseraa ikaartarfik Storbæltsbroen amerikarmiunut Goldman Sachs-imut tunineqalersoq. Amerikarmiut suliffeqarfiata Dong Energy pisiareqqammerpaa. Finansministeriap akigitinneqartut ilaatigut allineqarniarlutik.
Berlingske-p Rejsekortet pillugu allaaserisaqarpoq, Københavni kaajallallugu aninermut nalunaarsuutinik ikkussuisoqassasoq salloqittaassutigalugu allaaserinnittoqarluni.
Aamma qungussutariannguaq pillugu salloqittaasoqarpoq, tassani takornarissat isumaqartinneqarlutik qungussutariannguaq aalatinneqarsinnaallunilu oqaluttuartinneqarsinnaasoq.
Danmark isikkamik arsaannermi VM-eqataalersoq
BT-ip melodi grand prix-eqarnissaa pillugu salloqittaammik allaaserisaqarpoq, tassani Statsministerip Helle Thorning-Schmidtip erinarsorluni unamminermi peqataasussaq Basim EU-p erfalasuanik nassataqassasoq qinnuigisimagaa allaaserineqarpoq, Helle Thorning-Schmidt taamaasilluni EU-mi atorfikkaanngornissamut malunnarsaassalluni.
Politikenip timersortulerisartuisa Danmark isikkamik arsarnermi VM-eqataanissaa Brasiliami aasaru ingerlanneqartussami qanillisoq allaaseraat, Grækenlandip peqataanissaminut akissaqannginnera pissutaalluni.
Suliniaqatigiiffiit, politikkerit suliffeqarfiillu apriilip aallaqqaataani salloqittaavimmi assigiinngitsunik salloqittaaqattaarput.
Taski qungasersuup løvillu amiinik sanaaq
Københavnimi uumasuusivissuaq sulisussarsiortoq Jobindex-imi takuneqarsinnaavoq, tassani giraf-ip løvillu amiinik taskilianik pilerisaarisussatut suliaqartussamik sulisassarsiortoqarnera nittartakkamut ikkunneqarluni, 'Marius'-imillu katersat ateqartinneqassallutik.
Tennis-imik inuuniuteqarnikoq Kenneth Carlsen 40-nik ukioqartoq unammeqataaqqittalilersoq Dansk Tennis Forbund-imit nalunaarutigineqarpoq, marlukkaanermi Frederik Løchte Nielsen unammeqatigissagaa oqaatigineqarluni.