atuakkamik saqqummersitsineq
Sallak kusanartumik nalilerneqarpoq
Inuup allaaserineqarneranik atuakkiaq ''Sallak - Lars-Emil Johansen: Kalaallit Nunaanni politikkimi asseqanngitsoq” inunnit nuimasunit arlalinnit nersualaarneqarpoq, taakku atorfeqarnerminni nunatsinni naalakkersuinermut attuumassuteqarsimapput
''Inuup allaaserineqarneranik atuakkiaq - maligassaqqissumik suliarineqarsimasoq'' qulequtsiullugu Minik Rosing, ujarassiuutut professori aamma inuiaqatigiinnik oqallissaarisartoq aviisimi AG-mi ilaatigut allappoq.
Tutsuiginartoq unneqqarissorlu
- Lars-Emili tutsuiginartumik qularnanngitsumillu unneqqarissumik politikeritut imerajuttutut, ilaanneeriarlunilu qanorluunniit periarsinnaasutut aamma unneqqaserlussinnaasutut imminut ilisaritippoq, aammattaarli Kalaallit Nunaata siunissaanik allaanerusumik pitsaanerusumillu pilersitsinissamut pimoorussisuulluni. Lars-Emilip inuunermini sivisuumi iliuuserisimasaminut qisuariaatai atuakkami arlalippassuartigut ersersinneqarput, Minik Rosing allappoq naqissusiillunilu:
- Sallak atuarlugu soqutiginarluinnartuuvoq, Kalaallit Nunaannik soqutigisaqartut tamarmik atuarneratigut paasisaqarnerunissaat piinnarnagu, aammattaarli kikkut tamarmik inunnik soqutigisaqartut paasisaqarnerusinnaammata.
Ullorissanit tallimaasunit sisamat
Tusagassiornermik Ilinniarfiup pisortaata, tusagassiortup Naja Paulsenip, AG-mi tusagassiortoq Niels Ole Qvist ullorissanit tallimaasunit sisamanik tuniniarpaa, ilaatigullu ima allappoq:
- Ilumut atuakkama nukillaajummersilaarpaanga pissutigalugu atuakkami namminersornerulernerput tamatumalu kingunerani ukiuni qaangiuttuni nersorinninneruutigaluni aamma erseqqissumik oqaluttuarmat naalakkersuinerup iluani ulluinnaat kukkunernik, atornerluinernik sumiginnaanernillu ilaqarsimaqisut, ilaqutariinnut, ikinngutigiinnernut innuttaaqatigiinnernullu kinguneqartunik. Aamma eqqaasitsivoq tamakkorpiaat pissutigalugit akiuuttariaqartugut. Pissutsit pitsaanerusut anguniarlugit, nukiit taartut akiorniarlugit, ilinniartitaaneq aaqqissuussaanerlu pitsanngorsarniarlugit tamakkumi inuiaqatigiinni amerlanerusunut isumaqarmata, Lars Emil peqatigigutsigu peqatiginngikkaluarutsiguluunniit, Naja Paulsen allappoq.
Atuakkiatsialak
Martha Labansenip, Namminersornerullutik Oqartussani aamma KANUKOKA-mut pisortaasimasup naqissuserpaa ''Nunatsinni politikki pillugu taama pitsaatigisumik ilungersuussaatigisumillu atuagaqarsinnaaneq iluarinarpoq.''
- Politikkikkut takorluukkat, angusat kukkuluttornerillu pissanganartumik tamatigoortumillu oqaluttuarineqareersut namminiilivinnissamik kissaatigineqartunut angusaqarlutik sulisinnaasut amigaataanerat malunnartoq paasinarpoq, Matha Labansen allappoq.
Kukkunerit
Namminersornerullutik Oqartussani ukiorpassuarni pisortatut sulisimasoq aamma Kalaallit Nunaata Namminersorneq pillugu Isumalioqatigiissitaani siulittaasuusimasoq, cand.scient.pol Jakob Janussen, atuakkap atuarneqarnissaanut kaammattuivoq.
- Atuagaq atuaruk ”Kalaallit Nunaannilu politikkimi asseqanngitsoq” pillugu nammineq isumannik pilersitsillutit! Atuagassaqqilluinnartuuvoq, Jakob Janussen naqissusiivoq, taassumalu aamma atuakkamik naliliinermini kukkunernik uparuaavoq.
- Atuakkap ”Sallak”-mik qulequtserneqarsimanera tulluartuuvoq, inummimmi Kalaallit Nunaanni politikkimi politikkikkut isumassarsiaminik piumassuseqarluarluni uteriilluinnarlunilu malersuisoqarsimassappat taanna tassaavoq Lars-Emil Johansen, Jakob Janussen naqissusiivoq.
Naliliinerit atuakkit
Naliliinerit sisamat atuakkit, atuakkamilu kapitali siulleq tamaat aviisimi AG-mi aturauk, taanna uani digitaliusumik isissutissamik akiliillutik pissarsiarisinnaavat: