sillimaniarneq
Sakkutuut nunanit allaneersut arajutsineqarlutik Nunatsinnukariaannaasut
Naalagaaffeqatigiit sakkutuuisa nunat immallu issittut avannarlermi sillimaniarnerat annikigaarmat sakkutuut nunanit allaneersut malugineqaratik tikiussinnaapput. Arktisk Nyt taama allaaserisaqarpoq.
Russit, amerikkarmiut, canadarmiut norskillu sakkutuuisa timmisartui Kalaallit Nunaat qulaallugu timmisinnaasut danskit naalagaaffeqarfiat ataqqinnagu, soorlu aamma nunani takornartani sakkutuut sermersuarmi tammaarsimaarfiliorsinnaasut danskit illersornissaqarfiat arajutsisillugu. Arktisk Nyt misissueqqissaarnerup inernerinit taama allaaserisaqarpoq.
Nalunaarusiaq 'Forsvarsministeriets fremtidige opgaveløsning i Arktis' (Illersornissaqarnerup ministeriaqarfiata nunani immamilu avannarlermi siunissami suliassaat aaqq.) taaguutilimmeersumit siorna saqqummersumit aallaaveqarpoq.
Atuaruk: Issittumi sakkutuut annertuumik iliuuseqassanngikkallartut
- Ataatsimut isigalugu sakkutooqarfiup nunat immallu issittumi avannarlermiittut sillimaniarfiginera tamakkiisuunngilaq. Soorlu satellittet immallu iluani maluginiutit nakkutiginninnermi atorneqanngitsut, nalunaarusiami allassimavoq.
Sakkutooqarfiup aalisarnermut nakkutiginninneq, annaassinniarnermut sillimaniarneq, namminersortuusutut akuerineqarnissamut nakkutiginnilluarnissaq suliassaanut ilaasut Arktisk Nyt-imit tikkuartorneqarput.
Avannaani tunullu avannaani Siriusip alapernaarsuisui ataavartumik kisiartaallutik nakkutiginnittuupput. Taamaattoqarnerata nunanit allanit sakkutuut Kalaallit Nunaanukarsinnarlutik sakkutooqarfiliorsinnaasut ukiullu arlallit malugineqaratik Nunatsinniissinnaasut Arktisk Nyt inerniliivoq.