Mestersvig
Sakkutuut Mestersvigimi sungiusarfimmit umiarsuarmik aallartut
Arctic Responsemi sungiusaqatigiinnersuarmi angallassineq peqataasullu Tunumi ukiarsarluni silarlunneranit tatineqarput
Napasuliarmiut marluk Illersornissaqarfiup Mestersvigimi timmisartoqarfianik ukioq kaajallallugu nakkutilliisut tikeraartui arfininngornermi qulingiluaannanngorput. Peqataasut ilaat 150-it missaanniittut sapaatip-akunnerata ataatsip missaani ulloq unnuarlugu kaajallugu sungiusarnermik sukumiisumik ingerlatsisoqareersorlu sumiiffimmit tallimanngornermi aallarput, atortutilli tamangaajasa Mestersvigimut qimaannartariaqarsimallugit. Pilersaarusioqqissaarsimaneq imaliliorneranit, apummit, isikkivilunneranit mittarfiullu quatsersimaneranit akornuserneqarpoq.
Utiinnartariaqartut
Qallunaat Amerikamiullu timmisartui Herculesit sisamanngornermili Mestersvigimut minniaraluarput peqataasunik atortunillu angerlaassuinissaq aallarnerniarlugu. Timmisartut marluusut sumiiffik qulangiuaarpaat, isikkiviluppallaarmalli Keflavikimut utiinnartariaqarlutik.
Mittarfik quatsersimasoq
Tallimanngornermi misiliineq iluatsilluarneruvoq. Timmisartorsuit assartuutit marluullutik Mestersvigimut mipput, tamatumuunali unammilligassaq tassaalluni mittarfiup quatsersimanera, issangissertarneranit issilertarneranillu pilersimasoq. Qallunaat timmisartuata Herculesip tinginnginnermini ilaasut 65-iniit 30-nut ikilisariaqarsimavai, Amerikamiullu timmisartuat 41-nik ilaasoqarluni tingilluni. Air Greenlandip timmisartua Twin Otteri sungiusarnerup nalaani Mestersvigimiitinneqartoq sisamanngornermi tallimanngornermilu peqataasunik Nerlerit Inaannut Akureyrimullu timmisartuussivoq.
Thetisimut ilaasut
Sungiusarnermut peqataasut amerlangaatsiartut umiarsuarmut nakkutilliissummut Thetisimut, sapaatip-akunnerata ingerlanerani sungiusarfiup ungasinngisaani Kong Oscars Fjordimiissimasumut, ilaallutik maanna Mestersvigimit ingerlaarput. Taakkua Islandimut sapaammi tikissangatinneqarput Keflavikimiillu Danmarkimut timmisartussallutik.
Atortorpassuit
Atortorpassuit sakkutuunit immikkut sungiusarsimasunit frømandinit, jægersoldatinit, Danmarkimi upalungaarsimasoqatigiinnit, Islandimi Landsbjörgimit sakkutuunillu allanit atortorineqartut Mestersvigimut qimaannarneqartariaqarsimapput. Biilit, toqqit, gummibådit sukkasuuliat atortullu allat kingorna timmisartumik assartorneqassapput.
Ilimaginngisamik piviusorsiorneq
Arctic Response 2015 sungiusarnernik assigiinngitsunik katitigaavoq, sakkutuut sakkutuujunngitsullu sungiusaqatigiillutik. Peqataasut nittaalarnerujussuanit isikkivilunnerujussuanillu unammillerneqarput piviusorpalaartumillu misigisaqartinneqarlutik, tamannali ingerlatassatut pilersaarutaasut ilaannik taamaatitsiinnartariaqalernermik aamma kinguneqarluni.
Sakkutuut Danmarkimeersut Mestersvigimeeqataasut Issittumi Upalungaarsimasartoqatigiinnut pilersinneqaqqammersunut tamarmik ilaapput.
Aamma atuakkit: Øvelse: Jægersoldater og islandske redningsfolk kastes ned til nødstedte
Stor øvelse under pres af to overraskelser
Annaassiniarnermik sungiusarnermi immikkut sungiusarsimasut peqataassapput
Maskingeværit sakkortuut oqaatsitigullu aporfissat