eqqakkat toqunartut
Sakkutuut eqqagaat pillugit FN tamakkiisumik ammanissamik piumasaqarpoq
Amerikamiut sakkutuuisa eqqakkat toqunartullit suut Kalaallit Nunaannut qimassimaneraat isertuussinnginnermik Naalagaaffiit Peqatigiit misissuisua ujartuivoq.
USA-p eqqakkat qimaannagai pillugit ammanerunnginneq Naalagaaffiit Peqatigiit immikkut misissuisartuata Baskut Tuncakip ernumassutigaa.
Taassuma eqqakkat toqunartunik akullik inuit pisinnaatitaaffiinut qanoq sunniuteqarnersut misissortussaavaa. Taassuma sapaatip-akunnerini marlunni Danmarkimut aamma Kalaallit Nunaannut tikeraarnini naammasseqqammerpaa.
Naapertuilluannginneq
Amerikamiut sakkutooqarfigisimasaanni eqqakkat toqunartunik akullit immikkut ukkatarineqarput.
Baskut Tuncakip inaarutaasumik tusagassiortunik katersortitsinermi nassuiarpaa, ajornartorsiutit aallaaviat nunaqavissut innuttaasut pisinnaatitaaffiinik oqaluttuarisaanermi unioqqutitsinerni nassaarineqassasut.
- Nunaqavissut nunap immikkoortui aalajangiiffiginissaannut periarfissaqarsimannginnerat oqaluttuarisaanermi naapertuilluanngitsumik iliorneruvoq, taanna oqarpoq.
- Amerikamiut sakkutuuisa Kalaallit Nunaanniissimaneranni nunaqavissut aalajangiisarsimanernut ilaatinneqanngilluinnarnerat imaannaanngitsunik akerleriisitsinernik pilersitsivoq, siornatigullu unioqqutitsinernik kinguneqarluni, soorlu Pituffiup sananeqarfianit innuttaasut nuutsinneqarnerat.
Atuaruk: Naalagaaffiit Peqatigiit misissuiniarnerat Vittusip nuannaarutigaa
Isertuussiniarnerit isornartorsiorai
Danskit naalakkersuisuisa aamma Naalakkersuisut sakkutooqarfiit iluarsaaffigineqarnissaannut juunimi isumaqatigiissutaat Baskut Tuncakip nersualaarpaa. Kisianni amerikamiut ikumatissat, eqqakkat toqunartullit aamma radioaktiviusunik qinngornillit suut qimanneqarsimanerannik ammasuunissamik ujartuivoq.
- Amerikamiut sakkutuuinit ammanerunnginneq akerleriisitsinernik aamma nalorninernik suli pilersitsivoq. Qanoq pisoqarpiarsimanera suli paasilluarneqanngilaq. Tamanna nalornineq peerniarlugu annertuumik iliuuseqarnissaq pisariaqassaaq.
Tamakkiisumik ammanissamik piumasaqartoq
Baskut Tuncakip aappaagu septembarimi aatsaat nalunaarusiani Naalagaaffiit Peqatigiit inuit pisinnaatitaaffii pillugit ataatsimiititaliaanut saqqummiutissavai. Kisianni maanna innersuussutit ataasiakkaat saqqummiussinnaalereerpai.
- Amerikami naalakkersuisut danskit naalakkersuisuinut paasissutissat tamaasa tunniunnissaat pingaarluinnarpoq, taanna oqarpoq.
- Danskillu naalakkersuisuisa sapinngisaq tamaat kalaallit innuttaasut qanoq pisoqarsimaneranik ilisimatitsisariaqarput, qanga pisimanersut aamma ungasissoq eqqarsaatigalugu kingunerisinnaasaanut qanoq eqqugaasoqarnersoq.
Tamanna ajornartorsiutip aaqqiivigineqarnissaanut aallarniutaannaassasoq, taassuma naqissuserpaa.