Sakkutooqarfiup isumaqatigiissutaata suliarineqarnera nunanut allanut ministerip misissorniarpaa

Pituffimmi kiffartuussinissamut isumaqatigiissutip annaaneqarnera kikkut pisuussutigaat?

Danmarki USA-lu isumaqatigiissuteqarnikuugaluarput Pituffikki kiffartuussinissamut isumaqatigiissuteqartut suliffeqarfiit Danmarkiminngaanniissasut imaluunniit Kalaallit Nunaaninngaanniissasut.

Taamaakkaluartoq Amerikarmiut suliffeqarfiata Vectrusip danmarkimi suliffeqarfiutaa Exelis Services Pituffimmi kiffartuussinissamut isumaqatigiissuteqarfigineqarpoq 2,5 milliard koruuninik nalilimmik.

Nunanut allanut ministerip Martin Lidegaardip Radikale Venstreneersup atorfilittani suliakkippai. Tassani Nunanut allanut ministeriaqarfiup kiisalu Amerikarmiut silaannakkut sakkutuuisalu attaveqaqatigiissimanerat paasiniaqquaa. Exelis Servicesip kiffartuussinissamut isumaqatigiissuteqarneranummi tamanna kinguneqarpoq.

Tamanna pillugu TV2 Newsimut oqarpoq.

Inuussutissarsiornikkut aqutsisoqarfik isorineqarpoq
JyllandsPostenimiimmi pingasunngornermi allaaserineqarpoq Amerikarmiut apeqqutigisimagaat Exelis Services nunanit allaninngaannit aqunneqartuunersoq.

Ministeriaqarfik akissutaa pappilissani paasissutissanik qinnuteqarnikkut paasineqarpoq akisimasoq ministeriaqarfiup tamanna akissuteqarfigisussaanngikkaa, taamaammallu inuussutissarsiornermik aqutsisoqarfiup tamanna apeqqut akinissaanut innersuunneqarluni.

- Amerikarmiunik attaveqateqarsimanerup paasissutissiissutiginissaa atorfilittanut qinnuigaara, Martin Lidegaard TV2 Newsimut oqarpoq.

Lidegaard: Ministeriaqarfik ikiuisinnaanngilaq
Martin Lidegaardip oqaatigaa nunanut allanut ministeriaqarfik nammineerluni inuussutissarsiornermik aqutsisoqarfimmik paasissutissanik pissarsiniarsinnaanngitsoq.

- Arlaannaannulluunniit attuumassuteqaqqusaanngilagut taamaammat akuersissut amerikarmiunut tunniunneqarpoq.

- Nunanut allanut ministeriaqarfik ikiuisussaatitaanngilaq, taamaattumik ministeriaqarfimmit iliuuserineqartoq ajunngitsumik suliarineqarsimasoq maannakkut oqaatigisinnaavara, nunanut allanut ministeri oqarpoq.

Namminersorlutik Oqartussanit aamma suliamut tunngatillugu qanoq suleriuseqarsimanersoq Naalakkersuisunit misissorneqarpoq.