eqqakkat toqunartullit
Sakkutooqarfinni eqqakkat Vittusip pingaartunngortikkai
Vittus Qujaukitsoq Naalagaaffiit Peqatigiinnut maalaaruteqarnerata kingorna Naalaagaaffiit Peqatigiit amerikamiut Kalaallit Nunaanni eqqagaat misissuiniarnerat pingaaruteqarnerulersimavoq
Danmarkimut tikeraarneq piffissami sivisuumi pilersaarutaasimavoq.
Naalagaaffiit Peqatigiit eqqakkat inuit pisinnaatitaaffiinut atatillugu misissuiffigaat. Baskut Tuncak ukiut marluk matuma siorna qallunaat naalakkersuisuinit aggersarneqarpoq. Tikeraarnermilu Kalaallit Nunaaliarnissaq aammattaaq piffissami sivisuumi pilersaarutaasimavoq.
Aammat atuaruk: Sakkutuut eqqagaat pillugit FN tamakkiisumik ammanissamik piumasaqarpoq
Pingaarnerusoq
Ukiulli aallartilaarnerani Vittus Qujaukitsoq Naalagaaffiit Peqatigiinnut maalaaruteqarnerata kingorna suliaq ilungersuumminarsisimavoq.
- Ilisimaneqarluarpoq Vittus Qujaukitsoq uannut misissuisartunulli allanut marlunnut maalaarummik nassiussaqarsimanera. Tamanna suliamut allatorluinnaq isiginnilersitsivoq, Baskut Tuncak NP illorsuanni Københavnimiittumi tusagassiortunik katersortitsinermi naggasiilluni oqarpoq.
- Uissuumminartoq
Taassuma nassuiaatigaa paasissutissanik arlalinnik ilungersunartunik tigusaqarsimalluni. Saniatigullu Kalaallit Nunaanni Nunanut allanut Naalakkersuisoq qallunaat naalakkersuisuinut maalaaruteqarnera aamma uissuumminartuunerarpaa. Taamaammat maalaarut utertinneqaraluarmat misissuinissamut isiginninnera allannguisimanani.
- Paasissutissat assigiinngitsut tigungatsigit eqqumaniarnerulerpugut, Baskut Tuncak oqarpoq.
Tikeraarnermi Vittus attavigineqanngitsoq
Sermitsiaq.AG'p paasissutissaatai naapertorlugit maalaaruteqarnerup kingorna nunanut allanut naalakkersuisoqarfik Baskut Tuncakilu attaveqatigiittarsimapput.
Aamma atuaruk: Naalagaaffiit Peqatigiit misissuiniarnerat Vittusip nuannaarutigaa
Baskut Tuncak nassuiaatigaa tikeraarnermini Vittus Qujaukitsoq attaveqarfiginiartarsimangaluarlugu, iluatsissimanaguli. Nunanut allanut Naalakkersuisuusimasoq suliap misissuiffigineqarnialernera Sermitsiaq.AG'mut iluarisimaarlugu oqaatigisimavaa.
Baskut Tuncakip naqissuserpaa tikeraarnermini qallunaat kalaallillu oqartussaannit suleqatigineqarluarsimalluni.
- Amaaffigineqarluarpunga, taanna oqarpoq.
Taassuma nalunaarusiani ukiup tulliani septemberip qaammataanni utertissavaa.