Sakkulerluni ujajaasoq takuiuk?

Nuummi Center Grillimi sakkulerluni ujajaasoqarneranit sapaatip akunnera sinnerlugu ingerlareerpoq sulili politiit paasisaqanngillat innuttaasullu ikiuunnissaat noqqaassutigeqqillugu.

Sakkulerluni ujajaasoqarnera pivoq arfininngorneq novemberip aappaat ullaakkut arfernup missaani sulisoq matu ikersilaarlugu silami pujortataartillugu.

- Sulisup ujajaasoq tummeqqatigut aappaluttutisigut Qapiarfiusaap tungaaniit ammukarnera isigisimavaa. Angut sulisup tungaanut ingerlaannavissimavoq naggataatigullu arpalersorsinnarluni sulisoq qunusaarlugu aningaasarpassuarnik tunniussitissimallugu, Nuummi politiit paasiniaanermut immikkoortuannit Taatsi Fleischer nassuiaavoq.

Kiinarpaqarpoq
Ujajaasup qanilliartornerani sulisup isigeqqissaarsimavaa ilisarnaatigisinnaasaalu politiinut ingerlateqqissinnaasimallugit.

- Ujajaasoq qernertumik nasaasalimmik tujuuloqarsimavoq sølvitut qalipaatilimmik sigissartulimmik. Aamma sisorartartut kiinarpaannik tungujortumik kiinarpaqarsimavoq Oakleynillu taartunik isaruaqarsimalluni. Taartunik qarleqarpoq saneqqamikkut qaqortumik titarnilinnik. 165-170 centimeteriuvoq 20-it 27-illu akornannik ukioqarluni Nuummiorpaluttumik oqalulluni. Qasersunik aaqqateqarsimavoq, Taatsi Fleischer nassuiaavoq.

Angut kipisamik aallaammik sakkoqarsimavoq sulisorlu qunusaarlugu aningaasarpassuarnik tunniussitissimallugu puussiamut qaqortumut ikillugit tunniunneqartunik.

- Angut Qapiarfiusaap tungaanut tummeqqatigut arpalluni tarrissimavoq. Arlaata takussimassavaa arlaalluunniit pasitsaassaqarsimasoq assut oqaloqatigerusupparput paasinianerput ingerlaqqinniassammat, Taatsi Fleischer oqarpoq.

Center Grillip tunuatungaani video atorlugu alapernaarsuuteqarsimanngilaq ujajaasorlu Center Grillimut isivissimanngimmat alapernaarsuilluni assiliiviup isigisaaniissimanani.

Nuummi politiit oqarasuaatigaat 701448.

Linki ataani toorlugu takusinnaavat Center Grillip tunuaniit isikkivik. Taanna sammivinnit assigiinngitsorpassuarnit takuneqarsinnaavoq.