avaleraasartoorniarneq
Sakkortuumik isornartorsiuineq Kielsenip akerlilerpaa
Avaleraasartoortassat agguaanneqarnerat pillugu Aalisarnermut Ataatsimiititaliap apeqquterpassui Naalakkersuisut piffissaq eqqorlugu nangaassuteqaratillu akisarsimavaat, Naalakkersuisut siulittaasuat akilluni oqarpoq
Ukioq manna avaleraasartoortassat agguaanneqarnerat pillugu Aalisarnermut Ataatsimiititaliami amerlanerussuteqartut tusagassiorfinnut nalunaarutikkut takutitsiniaanerat Naalakkersuisut ilisarisinnaanngilaat. Ataatsimiititaliap agguaassinerup ingerlarnganut apeqquteqaataasa akineqarnerannut atatillugu Aalisarnermut Ataatsimiititaliami ilaasortat takkua Naalakkersuisunik isornartorsiuinerat Naalakkersuisut paasisinnaanngilaat.
Naalakkersuisut siulittaasuat Kim Kielsen tusagassiorfinnut nalunaarutikkut taamatut allappoq. Aalisarnermut Ataatsimiititaliap Naalakkersuisut ilaatigut isornartorsiorsimavaat paasissutissanik ersarinngitsunik tunniussisimanerannik. Taamaasilluni ataatsimiititaliamut tamakkiisumik takujuminaappoq avaleraasartoortassanik, taamaasillunilu iluanaarutissanik millionerpassuarnik, agguaassineq qanoq ingerlasimanersoq.
Kim Kielsen naapertorlugu isumasioqatigiinnernut tamanut Naalakkersuisut takkuttarsimapput, ataatsimiititaliallu apeqqutai tamaasa akisarsimallugit - oqaatsitigut allakkatigullu.
– Akissuteqarnissamut piffissarititat sivikitsuararsuusarsimagaluartut Naalakkersuisut ataatsimiititaliamut ilakkuminarsaartarsimapput. Maannakkorpiaq ataatsimiititaliamit apeqquteqaatit allat akissutissaat suliaraavut. Tamatumuunali Naalakkersuisut piumasaqarsimapput akissuteqarnissaminnut, ataatsimiititaliap tunngavilersornagu killissaritisaanit, akunnernik 48-uinnaanngitsunik piffissaqartinneqarnissartik, Naalakkersuisut sivikitsuinnarmik piffissaqartinneqarnermit peqqissaarnerusumik akissuteqarniassammata, Kim Kielsen oqarpoq, ilanngullulluguoqaatigalugu qinnuteqartut nalilerneqarnerannut tunngaviusut Naalakkersuisut tamanut saqqummiussimagaat.
– Qinnuteqarnissamut killissarititap naannginnerani qinnuteqartut tamarmik nalilersorneqarsimapput, itigartitaasimasullu tamarmik tunngavilersuutit tamanut saqqummiunneqarsimasut naapertorlugit itigartinneqarnertik pillugu tunngavilersuiffigineqarsimapput, Kim Kielsen oqarpoq, taannalu isumaqarpoq ingerlatsinermut inatsimmi sinaakkutassaritinneqartut naapertorlugit paasissutissat tunniunneqarsinnaasut tamaasa Naalakkersuisut tunniussimagaat.