oldboys GM
S.A.K-p utoqqasaartaasa Nagdlúnguak' finalimi unammissavaat
Siorna pissartanngortut NÛK utoqqasaat isikkammik arsarlutik pissartanngorniunneranni bronzinnanniutissapput
Aasaq manna isikkamik arsaannissarpassuit ingerlanneqaqattaaleruttorput. Sisimiunilu angutit utoqqasaat nuannerluinnartumik pisortatigoortuunngitsumik pissartanngorniupput, timersoqatigiiffik S.A.K ukiuni 65-inngortorsiortoq aaqqissuisoralugu.
Ulluni siullerni puljeni unamminerit naammassineqarsimalerput, kiisalu semifinalit ingerlanneqareerlutik.
Pissartanngorniutivittussat tupaallannartut
Ippassaq semifinale siullermi unamminermi S.A.K. hold 1 Sisimiut aamma Kâgssagssuk Maniitsoq unammipput. Tassanilu S.A.K. hold 1 4-2-mik ajugaavoq.
Nalunaaqutarlu 19.00 semifinalip aappaani unammillutik siorna Ilulissani finalemi unammisimasut NÛK Nuummiik kiisalu Nagdlungúak’ Ilulissat. Tassanilu unamminermi NagdlúnguaK’ ajugaavoq 1-0-imik.
Unammisartut pikkorissorpassuit
Sisamanngornermi kryds kampit ingerlanneqassapput. Taamaasilluni aqagu tallimanngornermi nalunaaqutaq 18.00 utoqqasaat pissartanngorniutivinnissaanni S.A.K. hold 1 kiisalu NagdlúnguaK’ unammissapput. Nalunaaqutarlu 16.00 bronzennaniu-tissapput Kâgssagssuk kiisalu NÛK.
- Malunnarpoq ukiuni kingullerni utoqqasaarpassuit suli piginnaasaqarluartorpassuit peqataasartut, assorujussuarlu isiginnaartuniit nuannerineqarlutillu malinnaaffigilluarneqartartut, Erik Jensen S.A.K-meeersoq oqaluttuarpoq.
Aappaagu GM
Utoqqasaat silami pissartanngorniuttarnerat 1990-ikkut missaani aallartinneqarmalli uge 29-imi ingerlanneqartarpoq. Utoqqasaat sapaatip akunnera 29-miittarnerannut peqqutaanerpaajuvoq, arsaqataasartut amerlasuut piniartuullutillu saniatigooralugu pinialuttortaqartarmata.
Taamaattumillu aavarfiit aallartilluannginneranni unammisaqattaarnernut peqataasinnaatikkumallugit GM uge 29-imut inissinneqarnikuulluni. Kiisalu minnerunngitsumillu aamma atuarfeqarfiit inissaqartitsisinnaasarneranni akikinnerusumillu aaqqissuussisinnaaneq ingerlakkumallugu piffissaq taannarpiaq allanngortinneqarneq ajorluni.
Aappagulu 2017-imi Maniitsumi Kâgssagssuk ukiuni 80-inngortussaq aaqqissuisoralugu pissar- tanngorniunneq uge 29-imi ingerlanneqassasoq aaliangerneqarpoq.
Utoqqasaat pissuserisarpaat GM-imi peqataasut akornanni aappaagussami sumi pissartanngorniunnissaq aaliangertarlugu, taamaasillutik aaqqissuisoorusuttut GM-imik aaqqissuussinissamik ‘aallertarnissaat’ piumasaqaataalluni.