pisassat
Saattuartassat ilavaat
Naalakkersuisut aalajangerput immikkut saattuartasseeqqinniarlutik
Sisimiuni aamma Nuummiit Paamiunut saattuarniat ukiup sinneranut pisassaqaqqilerput. Immikkut pisassiisoqarpoq Sisimiuni pisasseeqqinnissamut biologit akerliugaluartut.
Sisimiut eqqaanni saattuarniat pisassaat 150 tonsinik ilaneqarput.
- Sisimiut eqqaanni pisassiissutit qaffanniarneqarnerat Pinngortitalerifimmit mianersoqqussutigineqarpoq, saattuaqassuseq sakkortuumik tatisimaneqarmat. Pisassiissutissanik 150-tonsinik qaffaaneq immikkut ittuuvoq inassutigineqarlunilu akuersissutigineqartussatut, maannakkorpiaq aalisakkanik allanik tunisisinnaanermut periarfissaqartoqannginnera pissutigalugu, aalisarnermut piniarnermullu aqutsisoqarfik nalunaarpoq.
Nuup Paamiullu akornanni saattuarniat aamma 200 tonsinik pisasseqqinneqarput.
- Naatsorsuutigineqassaaq, Nuuk-Paamiuni pisassiissutinit 200 tonsinik qaffaaneq aamma Sisimiut eqqaanni 150 tonsinik sumiiffinni pineqartuni aalisartunut saattuarniarsinnaanermi aalisarsinnaanermi akuersissutilinnut piffissami sivikitsumi aningaasaqarniarnikkut pitsaasunik kinguneqassasoq, namminersorlutik oqartussat nalunaarput.