Saattuarniarneq: Royal Greenland aalisapilunnermi pisuusoq
Saattuarniat Niels Lorentzen aamma Siverth Knudsen, Royal Greenlandi Paamiut avannaani Sioriami aalisapilussimanerarpaa. Sulia Royal Greenlandimi misissorneqarpoq.
Tusagassiuutinut nalunaarummi saattuarniat paasissutissiipput, Royal Greenlandip kilisaataasa ilaat sumiiffimmi pullatinik nakkaatitsivioreersimasumi kilisattoq, taama pisoqarpoq naak saattuarniat Namminersorlutik Oqartussat suliffeqarfiutaannut pullatinik sumi nakkaatitsisimanertik pillugu nalunaarutigereersimangaluaraat.
Unitsittariaqartoq
- Taamaakkaluartoq kilisaatit naalagaat soqutigisaqanngitsutut illutik pullatigut aqqusaartarpaat. Taamatut pisoqartarnera akulikippallaarpoq, unittariaqarporlu, taamatut oqarpoq aalisariutaatilik Paamiuneersoq Siverth ”Kaati” Knudsen.
Taanna aalisarnermi ataqqeqatigiinnermik ingerlatsisoqartariaqartoq kaammattuuteqarpoq. Pullatimmi aserorternerisa saniatigut marrarsuarmik imaqalersarput qaqinniapiloorsinnaasarlutillu tamannalu angallatit sipiliinut ilungersuatitsisarpoq.
Misissuineq aallartinneqartoq
Sermitsiaq.AG-p sumiiffimmi pullatinik nakkaatitsiviusimasumi sooq kilisannissap pinaveersaartinneqarsimannginnera Royal Greenlandimut apeqqutigaa.
- Angallataatitsinnik aalisarfimmiittoqarsimasinnaanera Royal Greenlandimi misissuineq aallartipparput. Nalunaarsuutit atorlugit sumiiffimmi pineqartumi umiarsuit sorliit piffissarlu suna tassaniissimanersut takusinnaavagut, kilisaatinut pisortaq Jens Bisgaard Royal Greenlandimiit Sermitsiaq.AG-mut paasissutisssiivoq.
Jens Bisgaardip paasissutissiivoq, Royal Greenland pullatit sumiiffiinik paasitinneqarsimatilluni kilisaataatiminut paasissutissiiuaannartoq.
Paasitittuaannartigut
- Saattuarnianilli pullatit sumiiffiinik paasitinneqarsimanngikkutta sumiiffimmi pullateqarnersoq nalusarparput, kilisaatit pisortaat erseqqissaavoq.
- Saattuarniarnermi ajornartorsiut tassaavoq, pullatinik nuussisoqarsimatillugu aalisartut tamatigut paasititsineq ajornerat. Taamaammat pullatinik nuussisoqarsimatillugu paasitinneqarnissarput pingaarutilerujussuuvoq. Aalisartummi tulaassuisoraagut aalisarnerallu ajornartorsiutitaqanngitsumik ingerlanneqarnissaat soqutigisaraarput, Jens Bisgaard erseqqissaavoq.
Taarsiivigeqarnissamik piumasaqaat
Soorunami Royal Greenland akisussaaffimmik tigusilluni kilisaataatimi ilaannik sumiiffimmi kilisattoqarsimanersoq misissussavaa, taamaattoqarsimappallu taarsiivigeqquneqarnissamik piumasaqartoqarsinnaanera misissorneqassasoq, Jens Bisgaard paasissutissiivoq.
- Angallataatittalu ilaat sumiiffimmiissimanerat takutinneqarsinnaanngippat, taarsiivigeqqunissamik piumasaqarneq soorunami itigartissavarput, Royal Greenlandimi pisortaq paasissutissiivoq.