Saassussineq inuit 22-it inuunerannik naleqartoq

Ataasinngornerup unnukkuani nal 22.30 Ariana Grandemi Manchester Arenami tusarnaarnartitsineq naammassivoq, inuppassuillu tuusintilikkutaat nuannaartorisaminnik tusarnaareerlutik arenamiit aniapput.

Tassanngaannarlu nipituumik qaartoqarpallappoq, oqartussat aallavigalugit tamanna inuit 22-it toqqutigisimavaat, 59-illu ikiligaallutik.

Angut ataaseq qaartitsisuusimasoq, politiit ullaaq manna oqaatigaat.

Qaartartumeerisoq nammineq aamma qaartitsinermi toquvoq.

Qaartartumeerisoq, qaartartumeerinermit toqusimasunut 22-inut ilanngunneqarsimanersoq ersarinngilaq.

Arenap isaariaata ilaanni qaartitsineq inunnik uivertitsivoq.

- Qaarpalussuaq tusaavara, inuillu qaarfiusumit nilliallutillu qissallutik tungitsinnut qimarratilerput. Kikkut tamarmik paatsiveqaratik aniniarsaripput, tusarnaartitsinermi peqataasut ilaat, Jessica, BBC-mut oqaluttuarpoq.

Inuusuttuaqqat 21.000-it missaani tusarnaartitsinermi peqataasimasut, franskit nutaarsiassaqartitsiviat, AFP allappoq.

Tusarnaartitsiviup silataani angajoqqaat meeqqaminnik aallerlutik utaqqipput.

- Qungatsima nalaani kissartumik malugisaqarpunga. Qummut qiviarama inuit timaat amerlasuut takuakka, Elena Semino, panini 17-nik ukiulik aallertoq, aviisimut The Guardian-imut oqaluttuarpoq.

Cheryl McDonaldsip panini qulingiluanik ukiulik tusarnaariaqatigisimavaa.

- Inuuninni aatsaa taama ersitigaanga. Paninga quarsaaqqasupilussuuvoq, taanna tv-eqafik Sky-mut oqarpoq.

Taassuma qaartarumeeriffimmi alinarluinnarloq oqaluttuarileramiuk qissasiinnarpoq. "Meeqqanik ulikkaarpoq"

Qaartitsineq ingasaassinianit piliarineqarsimanersoq suli nassuerutigineqanngilaq.

Poppimik tusaamasaq Ariana Grande killitsisimaaqaluni Twitter-imini allappoq.

- Aliasoqaanga. Qamannga pisumik, utoqqatseqaanga. Oqaasertalersinnaanngilara.

Taassuma Europami angalaarnini taamaatippaa.