Royal Greenland
Saarulliup tunisassiarineqarnera ingerlalluartoq
Naak aalisartut aggustimiik saarullittaqannginnerugaluartut, saarullinnik uumasunik tunisineq Maniitsumi aalisartunut aningaasatigut iluanaarfiuvoq
Nutaaq Codinik - tassa saarullinnik uumatillugit tunineqartartunik aamma pilertortumik immikkuullarissumillu Royal Greenlandip Maniitsumi tunisassiorfiani tunisassiarineqartartunik - tunisassiornerup aallartinnera kingusikkaluartoq ukioq manna tunisassiorneq pilertornerusumik teknikkikkullu ajornartorsiuteqarfiunnginnerusumik ingerlanneqarpoq.
Royal Greenland nittartakkamini taama allaaserisaqarpoq.
- Saarullinnik uumasunik tunisisinnaaneq ukioq manna aatsaat maajip 15-iani – tassa siornarnit qaammamik ataatsimik kingusinnerusumik - ammarneqarpoq. Taamaakkaluartoq siorna qaammatit tallimat ingerlaneranni angusatta annertoqataat ukioq manna qaammatit marluinnaat ingerlaneranni anguvagut, Royal Greenlandip Maniitsumi tunisassiorfiani ingerlatsisoq Susanne Marie Knudsen oqarpoq.
Decembarip tungaanut tunisassiorneq
Taassuma angusat naammagisimaarpai, naak Maniitsumi saarullinniarneq aggustimili ingerlanerlussimagaluartoq.
- Aalisartut saarullinnik uumasunik tunisinissaminnut nalunaaruteqareersut piffissami kingullermi amerliartuinnarmata Nutaaq Cod-inik tunisassiornerput ukioq manna deembarip aallaqqaataata tungaanut ingerlassinnaassagipput neriuutigaara, Susanne Marie Knudsen erseqqissaavoq.
Royal Greenlandip Maniitsumi tunisassiorfiani sulisut tunisassiorfiullu allaffiani sulisut katillugit 210-220-t missaanniittut saarullinnik uumasunik 5000 tonsit missaaniittunik maajimi, junimi juulimilu tunisassiornermi suleqataapput. Saarulliit nerpii, saarulliit ilivitsut niaquikkat erlaviiakkallu kiisalu nutaggariit Nutaaq Cod-iliaralugit tunisassiarineqartarput.