Aalisarneq

Saarullittassiissutit kinguartinneqartut

Sinerissap qanittuani aappaagu saarullittassiissutissat Naalakkersuisut suli piariinngilaat

Ukioq manna sinerissap qanittuani saarullittassiissutit eqqartugaalaavipput, tassani marloriarluni saniatigut pisasseeqqittoqarpoq.

Maannalu paasinarsivoq, Naalakkersuisut aappaagumut pisassiissutit suli piareersimanngikkaat.

Tamanna aalisakkat assigiinngitsut pisassiissutigineqartut pillugit tusagassiuutinut nalunaarummi aalisarnermut piniarnermullu naalakkersuisoqarfimmit nassiunneqartumi atuarneqarsinnaavoq.

- Sinerissap qanittuani aappagu saarullittassat pillugit Naalakkersuisut januaari aallartissimalerpat 2017-imi aalajangiiffigissavaat, tusagassiuutinut nalunaarummi allaqqavoq.

Atuaruk: Enoksen: Pingasoriaatinngornerat aarlerinanngilaq

Innersuussutit malinnianngikkai
AG-mi saqqummertumi kingullermi aalisarnermut piniarnermullu naalakkersuisup, Hans Enoksenip (PN), biologit siunnersuutaannit amerlanerungaatsiartumik pisasseeqqittoqarnissaa naatsorsuutigalugu nalunaarutigaa.

Tamatuma saniatigut nalunaarutigineqarpoq, pisassiissutit juullip ukiortaallu akornanni nalunaarutigineqarnissaa nalunaarutigineqarpoq.

Atuaruk: Saarullittassiissutit siunnersuutigineqartunit pingasoriaammik amerlanerupput

Pisassiissutit siunnersuutigineqartup marloriaataanit aallartittut
Saarullittassiissutinut tunngatillugu biologit Pinngortitaleriffimmeersut siunnersuutaannut aamma politikkikkut aalajangernermut tunngatillugu imminnut ungasissorujussuunikuupput.

Aalisarnermut naalakkersuusimasoq, Karl Kristian Krusep (S) 25.000 tonsinik pisassiissuteqarneranik ukioq aallartinneqarpoq, tamannalu biologit siunnersuutigisaannit 12.379 tonsiusunit marloriaataavoq - tassa biologit piujuaannartitsinissamut tunngatillugu naliliinerat.

Atuaruk: Saarullittassat 8.000 tonsinik amerlineqarput

Oktobarimi saarullinniarneq unitsinneqartoq
Pisassiissutaasut amerlagaluartut oktobarip aallartilaaginnarnerani tamakkerneqarput, aalisarnerlu unitsinneqartariaqarpoq.

Tamatuma saniatigut aalisartut saarulleqarluarnerarpaat.

Karl Kristian Krusep kingoraartaata, Nikolaj Jeremiassenip (S) tamatuma 8.000 tonsinik saniatigut pisassiissuteqartippaa. Taamaalilluni pisassiissutit innersuunneqartunit 2,7-mik amerlanerulerput.

Atuaruk: Saarullitassat amerlineqarnerat akeqarsimavoq

2017-imi ikileriarnissaat ernumassutigineqartoq
Immami saarullippassuaqartoq Pinngortitaleriffiup ilisimallugu nalunaarutiginikuuaat, kisianni immikkuullarissumik ukioqatigiiaarpassuit tassani pineqarnerarpaat, taakkulu takusinnaanerarpaat piaqqiortoqarpallaarsimanngitsoq.

Tamanna tunngavigalugu saarullinniarneq aappaagu ajorseriasaarnissaa ilimagaat.

Saqqumilaanngitsumik isumaqatigiinneq
Saniatigut pisassiissuteqarneq naalakkersuisoqataasimasunit Demokraatinit nuannarineqarpallaanngilaq.

Kisianni saqqumilaanngitsumik isumaqatigiinnermut akuersaarput, tassanilu appat qaleraliilu illersorneqarnerat annertusitippaat, pisasseeqqinnerlu akuersissutigaat. Tamatuma saniatigut saarullittassiissutit ilaqqinneqannginnissaannik neriorsuiffigineqarput.

Kingulleq taakkartorneqartoq partii naalakkersuisoqatigiinnit peersinneqarmat atavallaanngilaq.

Qaffaaqqinneq
Decembarip aallartinnerani aalisarnermut piniarnermut naalakkersuisup, Hans Enoksenip (PN) pisassiissutit qaffaqqippai, taamaalilluni biologit siunnersuinerannit pingasoriaatingajanngorluni.

Juullinngilaartorlu taanna AG-mut oqarpoq, biologit siunnersuutaannit pisassiissutit amerlanerunissaat naatsorsuutigalugu.

Atuaruk: Demokraatit Naalakkersuisut isumaqatigiissummik unioqqutitsinerarpaat

Naalakkersuisut appat illersiorneqarnerunissaat aalajangiusimaannarpaat, piffissap piniarfiusut killilersorneqarneri ippassaq nalunaarutigineqarput.

Qaleralinnut tunngatillugu sinerissap qanittuani ukioq manna pisassiissutit malinneqarput, taakkulu biologit siunnersuinerannit pingajorarterutaanik amerlanerupput.

Powered by Labrador CMS