Aalisarneq

Saarullittassiinissaanik politikkikkut tatineqartut

Kitaani sinerissamut qanittumi saarullittassat Nikolaj Jeremiassenip qularnanngitsumik amerlissavai, biologit siunnersuutaat qangarsuarli qaanerneqareeraluartut

Torsk, fiskekasse
Biologit oqarput 12.379 tonsinik saarullittassiisoqassasoq, Naalakkersuisut oqarput 25.000 tonsiussasut, partiinilu naalakkersuisooqataasuni Siumumi Atassummilu politikerit arlallit piumasaraat ukiup sinneranut immikkut ittumik pisassiisoqassasoq

Aalisarnermut, piniarnermut nunalerinermullu Naalakkersuisup Nikolaj Jeremiassenip septembarip 28-anni aalisartoq 65-inik ukiulik Jan Olsvig nersualaarpaa, taanna Ilulissani Halibut Greenlandip aalisakkanik suliffissuanut saarullinnik tunisisarmat.

Isumaqartoqaraluarpoq Qeqertarsuup Tunuani aalisartut saarullinniarnissartik soqutiginngikkaat, saarulliit tunineranni akiat qaleralinnit appasinnerujussuummat.

Pisassat nungupallanneqartarput
– Saarullinniartoqartoq tusarlugu nuannerpoq, Nikolaj Jeremiassen Jan Olsvigimut oqarpoq, taannalu septembarimi saarullinnik tonsimik ataatsimik tunisaqarsimavoq, nunami suliassaqartitsisunik.

Eqqanarli.

Sapaatip akunnera ataaseq qaangiutiinnartoq, oktobarip 5-anni, sinerissamut qanittumi ukiumut saarullittassiissutit 25.000 tonsit nungunneqarput, Jan Olsvigilu Kitaatalu sineriaani tamarmi saarullinniaqataasa saarullinniarnertik unitsittariaqarpaat.

Amerlineqassagunarput
Taamaattorli.

Saarullinniarnerup taama siusitsigisukkut unitsinneqarnera pissutigalugu Nikolaj Jeremiassen pisassanik qaffaanissaanik politikkikkut sakkortuumik tatineqarpoq.

Taamaasiornialerunarporlu.

Aalisarnermut naalakkersuisutut siulerisimasaa Karl-Kristian Kruse ukiup ataatsip matuma siornatigut taamatorpiaq atugaqarpoq, 2015-illu naalernerani saarullittassat 2.500 tonsinik amerlivai, taamaasilluni siorna saarullittassiissutit tamarmiusut 27.500 tonsinngorlugit.

Oqaluttuaq tamaat Sermitsiami atuaruk, taannalu ullumi pisiniarfinni pisiarisinnaavat. Aviisi aamma pisiarisinnaavat uani:

Powered by Labrador CMS