Aalisarneq

Saarullittassat ilaneqarnissaanik KNAPK-p kissaataa Atassummit taperserneqarpoq

Aalisartut piniartullu peqatigiiffiata Naalakkersuisunut saarullittassiissutit ilaneqarnissaannik qinnuteqaateqarpoq. - Qularinngilluinnarparput 5.000 tonsinik pisassiissutit ilaneqarsinnaasut, Atassummit oqaatigineqarpoq

Knud Kristiansen
Atassutip siulittaasua, Knud Kristiansen

Saarullittassat 2014-mi 15.000 tonsinut inissinneqarsimapput, oktobarillu qaammataani aalisarnermik inuussutissarsiuteqartunit nalunaarutigineqarpoq saarullittassat nungulersut. Taamaammat Naalakkersuisunut KNAPK qinnuteqaateqarpoq 3-5.000-illu tonsinik ilaneqassasut.

Aalisartut piniartullu peqatigiiffiata qinnuteqaataa Atassummit taperserneqarpoq.

- Atassummit innersuussutigalugu sineriassuatta imartaani aalisagarpassuit takkusimaartalernikuusut aammalu uppernarsarneqarsinnaasoq saarullippassuit takkusimaartut piujuaannartitsinissamik pingaartitsineq minnerulersinngikkaluarlugu qularinngilluinnarparput 5.000 tonsinik pisassiissutit ilaneqarsinnaasut, tamannalumi aamma qularutiginagu KNAPK-p GA-llu tungaanit nalunaartoqareerpoq, Atassutip siulittaasua Knud Kristiansen tusagassiutinut nalunaarummi allappoq.

Atassummit pingaartinneqarpoq aalisarnermik inuussutissarsiuteqarnerup annerpaamik inuiaqatigiinnut iluaqutaalluni akimmiffilersorneqarpallaaranilu ingerlanneqarnissaa.

- Taamaammat Atassummit matumuuna Naalakkersuisunut ammasumik allagaqarluta kaammattuutigissavarput sinerissamut qanittumi aalisartunut saarullittassat 5.000 tonsinik ilaneqarnissaat piaartumik isumannaaqqullugu, Knud Kristiansen oqarpoq.

Powered by Labrador CMS