Uummannaq

Saarullippassuit panertinneqassapput

Uummannami aalisakkanik tunisassiorfiup saarulliit tunisassiassat 30 tonsit nivinngarneqassasut anguniagarai

- Saarullinnik panertussanik nivinngaatiterilluta sapaatip akunnera kingulleq aallartippugut, apriilillu tungaanut nivingatissallutigik, Uummannami tunisassiorfimmi ingerlatsisoq oqarpoq

Ulluni makkunani Uummannap aalisakkanik tunisassiorfiani saarullinnik issimut panertitassanik nivinngaassuisoqaleruttorpoq.

Saarulliit maskiinamik tisaat tonsit tallimat Paamiuni tunisassiorfimmi suliat Uummannami tunisassiorfimmi panertitassanngorlugit siorna nassiunneqarput.

Aalisakkallu 30 tonsit panertinneqarnissaat anguniarneqarpoq.

Piffissamik sipaaruteqartut
Taamaaliorneq pissuteqarpoq Uummannami aalisakkat assammik tisaneqartarmata saarullinnik tisanermi piffissaq sivikinnerusoq atorniarlugu. Anguniagaavoq tunisassiat saarulliit issimut panertitat annertunerulernissat.

- Saarulliit Paamiuni maskiinamik tisaat suliareqqinniarneri ilimagisamiit pisariuneruvoq, maannakkulli saarulliit tamarmik panertitsivimmut nivinngarneqareerput. Maanna saarulliit Uummannami tunitsivimmi tunisat tisaneqarput. Decemberip qeqqata missaani panertitsivitta ulikkaarnissaa naatsorsuutigaara, RG.gl naapertorlugu Kirsten Jensen oqarpoq.

Pitsaasut
Issimut panertitanik tunisassiornermi silaannaap nillernitsisimalernissaa pingaaruteqarpoq.

- Siusinaarluta aallartikkutta tunisassiatta pitsaassusaat ajorsisinnaapput silaannap kiappallaarnera pissutaalluni. Saarulliit nivinngarneqaraangamik qerisarput, paneriartornerallu arriitsuararsuusarluni. Taamaammat saarulliit issimut panertitat pitsaasuussappata nakkutigilluarneqarnissaat pingaaruteqarpoq, Kirsten Jensen oqarpoq.

Uummannami tunisassiorfimmi tupissutit aamma panertinneqartartut, Royal Greenland ilisimatitsivoq.

Powered by Labrador CMS