marloriaammik pisassiineq
Saarullinnik pissaasiineq akisussaasuseqanngitsoq Atassut isumaqarpoq
Karl-Kristian Krusep saarullittassat biologit siunnersuutigisaannit marloriaatinngorlugit qaffannissaannut aalajangernermini, saarullinniarneq tamaat pilliutiginissaanut aarlerinarsisippaa, Inatsisartuni ilaasortaq Steen Lynge Atassummiit isumaqarpoq
Naalakkersuisut ukioq manna saarullinniarneq aallarneqqippaat saarullinnik pisassat Pinngortitaleriffimmit siunnersuutigineqartut 100 procentit qaangerlugit pissassiissuteqarlutik.
Tamannalu partiimit naalakkersuisooqataasunit Atassummit pakatsissutigineqarpoq.
- Pisassiissutit 25.000 tonsinut qaffallugit tunngavianut naapertuutinngippat illersorneqarsinnaanngilaq, Steen Lynge tusagassiuutinut nalunaarummi allappoq.
Suliffissanik pilersitsiniarneq pilliuteqarsinnaasoq
Aalisarnermut naalakkersuisup, Karl-Kristian Krusep Siumumeersup, siunniussineq suliffissanik pilersitsinissamut pingaaruteqarneranik tunngavilerpaa.
Kisianni tunngavilersuut akunnakusoortuusoq Steen Lynge isumaqarpoq. Pisassiissutit marloriaammik Naalakkersuisut iliuusaattut qaffanneqarneraninngaanniik, nunatsinni aalisakkerivinnut tulaassuisussaatitaaneq annertusineqarneratigut suliffissanik pilersitsisoqarnerusinnaasoq taanna isumaqarpoq.
Pisassiissutinik qaffaaneq siunissami aalisarnermut ajornartorsiulersitsiinnarnissaa, Steen Lyngep annilaangassutigaa.