Aalisarneq

Saarulliit tunisat amerleriangaatsiartut

Ukioq manna saarulliit Royal Greenlandip sinerissami suliffissuinut tunitsiviinullu tunisat, siornamut sanilliullugit marloriaatai sinnerlugit amerlanerupput

Sinerissami Royal Greenlandip suliffissuinut tunitsiviinullu saarulliit tunisat siornamut sanilliullugu marloriaatai sinneqarput

Januaarip aallaqqaataaniit maajip tungaanut saarulliit tunisat 4.000 tonsit missaanniipput, siorna piffissami tassani tunisat 1900 tonsiusimallutik.

Saarulliit tunisat amerleriarnerat Nuummi malunnartorujussuuvoq, tassani saarulliit Roayl Greenlandip suliffissuanut tunisat siorna piffissamut tassunga sanilliullugit 40 procentingajannik amerlanerusimammata.

Sulisut aalajaatsut

– Kutterit 12-t uagutsinnut tunioraasut manna tikillugu saarullinnik 616 tonsinik tunisaqarsimapput, siorna piffissami tassani 450 tonsit tunineqarsimallutik, Royal Greenlandip Nuummi suliffissuani pisortaq Theo Didriksen Royal Greenlandip nittartagaanut oqarpoq.

Taassuma aamma aalajaatsunik sulisoqarnertik nuannaarutigaa.

– Apreiilimiilli suliffissuarmi ulapittorujussuusimavugut. Taamaattumik sulisuvut 20-niit 40-nut marloriaatinngortissimavagut. Sulisuvut sulilluarput aalajaatsuullutillu, sapaatillu akunnerisa naaneranni sulerusussuseqartarnerat uannut nuannersuuvoq, suliffissuup pisortaa oqarpoq.

Tunisineq illoqarfinni allanissaaq siuariarpoq

Royal Greenlandip paasissutissiissutigaa sinerissami Royal Greenlandip suliffissuinut tunitsiviinullu amerlanerpaanut tunisat ukioq manna amerleriarsimasut.

Maniitsumi tunisat siornamut sanilliullugu pingasoriaatai sinnerlugit amerleriarsimapput, siorna januaarimiit maajimut tassunga saarulliit 263 tonsit tunineqarsimammata, ukioq manna 1000 tonsit tunineqarsimasut.

Powered by Labrador CMS