Aalisarneq
Saarulliit akii pillugit isumaqatigiissut inissippoq
Royal Greenlandip KNAPK-llu saarullinnut akit pillugit isumaqatigiissut atsiorpaat
Kalaallit Nunaanni Aalisartut Piniartullu Kattuffiat, KNAPK aamma Royal Greenland A/S saarulliit akii pillugit isumaqatigiissuteqarput. Royal Greenlandi nittartakkamini allappoq.
Akit pillugit isumaqatigiissut 2017-imi apriilip aallaaqqaataaniit atuutilertussaq isumaqatigiissummik nutaamik isumaqatigiittoqarnissaata tungaanut atuuttussaq Kalaallit Nunaani Royal Greenlandip tunitsiviinut tamanut atuuppoq.
Saarulliit niaqullit ammarneqanngitsut kiilumut 4,00 koruunit aammalu saarulliit aalisaammik ningittakkanik bundgarninik aalisaammilluunnit pisat, kiilumut 8,00 koruunit
Isumaqatigiissut saarullinnut niaqulinnut ammarneqanngitsunut atuuttoq Maniitsumi Royal Greenlandip tunisassiorfianut saarullinnik uumasunik tunisinermi atuutsinneqartussatut naatsorsuussaasoq ajunngitsorsiassartaqarpoq. Ajunngitsorsiassat tunisat annertussusiannik aallaaveqartoq 2017-imi decemberimi tunniunneqassaaq.
Paasissutissat sukumiinerusut Royal Greenlandip nittartagaani takuneqarsinnaapput.