naalagaaffeqatigiinneq
Saammaateqatigiinnissamut Isumalioqatigiissitaq isornartorsiuisumut oqaaseqartoq
Kalaallit Saammaateqatigiinnissamut Isumalioqatigiissitaat pillugu Thorkild Kjærgaard isornartorsiuereersoq, Saammaateqatigiinnissamut Isumalioqatigiissitaq anguniakkaminik saqqummiussivoq
Ilisimatusarfimmi lektorip Saammaasseqatigiinnissamut Isumalioqatigiisitaq isornartorsioraa nittartakkami allaaserineqartareerpoq, tassani Ilisimatusarfimmi lektorip Thorkild Kjærgaardip Saammaasseqatigiinnissamut Isumalioqatigiissitaq isornartorsiorpaa.
Saammaasseqatigiinnissamut Isumalioqatigiissitami ilaasortaasup Klaus Georg Hansenip tupaallaatiginngilaa.
- Thorkild Kjærgaardip isumalioqatigiissitap atuutsinneqartariaqarnera apeqquserpaa. Isummanik taamaattunik saqqummertoqarnera soqutiginarpoq, kalaallit Saammaateqatigiinnissamut Isumalioqatigiissitaata suliaanik ersersitseqataagami.
- Hr. Kjærgaardip ilaatigut innersuussutigaa qallunaat statsministeriata Helle Thorning-Schmidtip suliamut tassunnga Danmarkip peqataanissaanik kissaateqannginneranik saqqummiussaqarnikuunera. Tamanna tunuliaqutaralugu Kjærgaardip Kalaallit Nunaata nunasiaataanerata oqaluttuassartaanik saqqummiusseriarpoq qallunaat statsministeriata isummiussaanut tapersersuisumik. Qallunaat tungaannit kalaallit Saammaateqatigiinnissamut Isumalioqatigiissitaata maannamut paasissutissanik katersineranik, suli ingerlanneqarallartussamik, tamanna akuliunneruvoq, Klaus Georg Hansen oqarpoq.
Kalaallit oqariartuutaat
Illuatungeriit tamarmik ilanngussaqarnissaat Saammaateqatigiinnissamut Isumalioqatigiissitamit kissaatigineqarpoq, Danmarkimit aamma oqariartuutigineqartut ilaatinneqarnissaat Klaus Georg Hansenimit oqaatigineqarpoq.
- Maannakkut ilanngussamut tunngatillugu oqaatigineqartut ima paasivarput, Kalaallit Nunaata nunasiaataasimaneranit oqaluttuaq qallunaat isumaannut, taamalu statsministerip isumaanut, naleqqussarlugu oqaluttuariniarneqartoq”, isumalioqatigiissitami ilaasortaq Klaus Georg Hansen naliliivoq nangillunilu:
- Kisianni Saammaateqatigiinnissamut Isumalioqatigiissitamit kalaallit isummersuutaat pingaarnerutinneqarpoq, soorlu isumalioqatigiissitap suliassaannik nassuiaammi taamannak allassimasoqartoq. Tamassuma ilaatigut nassataraa Kalaallit Nunaata nunasiaataanermik oqaluttuassartaanik nutaamik isiginnilerneq, taamaalilluni Kalaallit Nunaata nunasiaataanermik oqaluttuassartaata qallunaanit taamaallaat saqqummiunneqartarneranit - soorlu maanna Kjærgaardimit saqqummersinniarneqartumit – allamik peqalerluni, Klaus Georg Hansen oqarpoq.