Saammaateqatigiinnissamik suliaqarneq millionilikkuutaanik akeqassaaq

Saammaateqatigiinnissamik isumalioqatigiissitaq nalunaarusiani tallimanngormat Naalakkersuisunut saqqummiullugulu tunniuppaa.

Siunnersuutilli sorliit aallartinneqassanersut politikkerit massakkut eqqartortussavaat. Saammaateqatigiinnissamut isumalioqatigiissitallu sulinera naammassingaluartoq, isumalioqatigiissitap innersuussutai isumassarsiaalu malillugit saammaateqatigiinnissamik sulineq suli naammassinneqarsimanngilaq.

Saammaateqatigiinnissamik isumalioqatigiissitap ukiut pingasut affaatalu ingerlanerani inuiaqatigiinnut 10 million koruuninik aningaasartuutigineqarsimavoq, isumalioqatigiissitallu innersuussutai isumassarsiaalu malillugit politikerinit akuerineqassappata aningaasartuutigineqarsimasut amerlanerulissapput.

Suliniutit assigiinngitsut ingerlanneqarnera qanoq aningaasartuutigineqarsinnaanera isumalioqatigiissitamit nalilersorneqarsimanngilaq. Tamanna isumalioqatigiissitami ilaasortaniik politikerinut suliakkiunneqarsimavoq.

Siunnersuutini aningaasartuutigineqarsinnaasutut suliniutiginiarneqartut:

Toqqorsivik digitaliusoq. KNR-p toqqorsivissua digitalinngorsarneqassaaq, taamaasiornikkut oqaluttuarisaanermut attuumassutillit tamarmarmik internettimiit nunamilu katersugaasivinniit iserfigineqarsinnaalissaaq. Tamanna immikkut aningaasaliissuteqarnikkut pissaaq.
Kalaallit qaammatisiutaat nunatsinni nalliuttorsiorfinnik imalik. Qaammatisiut inuiaqatigiit ilisarnaataasumik assuartunik, eqarlunniartunik, aavartunik, kaperlattumi, 24 decembarimi juulliaraq allanillu imaqassaaq.
Meeqqat Danmarkimut nassiunneqarsimasut nalunaarsorneqarnerat

Sooq Danmarkimut nassiunneqarsimanersut, qanoq sivisutigisumik tassaniissimanersut aamma Danmarkimiinneranni akulerutsinniarlugit qanoq iliortoqarsimanersoq, taakkua qanoq kingorna ingerlasimanersut – Danmarkimiiginnartut aamma Kalaallit Nunaannut angerlarsimasut tamaasa eqqarsaatigalugit, takussutissiamik nalunaarsuisoqassaaq.

Innersuussutini suliniutissat aningaasartuutitaqartussat:

Kalaallit Nunaata oqaluttuassartaa allanneqassaaq: "Kalaallit Nunaata oqaluttuarisaanera –uagutisitsinnikisigalugu". Inuiaqatigiit oqaluttuarisaanerannik aamma innuttaasut ataasiakkaat oqaluttuassartaannik imaqassaaq, imarisaalu atuarfinni, nutaarsiassaqartitsivinni inuillu naapeqatigiittarfiini takuneqarsinnaassallutik.

Oqaluttuarisaaneq aamma saammaateqatigiinneq pillugit ilisimasat Ilimmarfimmut katersorneqassapput. Nunasiaataasimanermit kingornussat pillugit kalaallisut oqariartaatsit taaguutinik nutaanik ilaneqaqqullugit, saammaateqatigiinnissamut periusissani nutaani ineriartortinneqartumi atorneqarsinnaasunik.
Saammaateqatigiinnermut aningaasaateqarfik periutsinik katsorsaariaatsinillu ineriartortitsineq tapersersorneqassaaq, katsorsaataaqataasinnaammat nunatsinni innuttaasut katsorsaanermik periutsimut tunngaviusumik eqqarsaatersuutinik pilersitseqataaffigisaat aamma innuttaasut ataatsimoorfigisinnaasaat, tamatumalu saniatigut inuiaqatigiinni najugakkatsinni nukittuffiit amerlaqisut ersersinneqarlutik. Suliniutit ilisimatusarnerillu aningaasaateqarfiup tapersersussavai.

Ileqqorissaarnermut siunnersuisooqatigiinnik pilersitsisoqassaaq, taakku inuiaat ataatsimoorussatut naleqartitaannik suliamik aallartitsinissamut akisussaatinneqassallutik. Ileqqorissaarnermullu apeqqutit inuiaqatigiinni pilersartut pillugit akisussaaffeqassapput, aamma inatsisinik malittarisassanillu nutaanik suliaqarnermut tunngatillugu.

Oqaatsittalu siuarsarnerinut tunngassuteqartunik aamma suliniutit arlallit innersuussutigineqarsimapput.