Saammaateqatigiinneq sammisaq misigissuseqarfiusoq

Ileqqorissaarneq (mianersoqqussut!), saammaateqatigiinnissat ingerlaasii pillugit atuartitsissutissani nutaani tamanna allaqqavoq, taakku inuusuttunut GUX-mi ilinniartunut tulluarsagaapput.

- Saammaasseqatigiinnissamut Isumalioqatigiissitaq - tamannalu pillugu oqallinneq - misigissusilersorfiusinnaavoq, ingammik kinguuaariinni utoqqaanerusuni, taammaammat ilinniartitsisup oqallinnerit inunnut tunngavallaannginnissai maluginiassavaa, suliamut tunngasuussammata, atuartitsissutissani nutaani tamanna allaqqavoq, tamatuma kinguaariit peroriartortut saammaateqatigiinnissamut isumalioqatigiissitap suliaanik paasinninnissaat qulakkiissavaa.

Saammaateqatigiinnissat faagini arfinilinni
Suliaq Saammaateqatigiinnissamut Isumalioqatigiissitamit ataqatigiissarneqarpoq,Kalaallit Nunaanni GUX-ini ilinniartitsisut aammalu Namminersorlutik Oqartussani Ilinniartitaanermut, kultureqarnermut, Ilisimatusarnermut Ilageeqarnermullu Naalakkersuisoqarfik suleqatigalugit.

- Uagutsinnut pingaaruteqarsimavoq, isumalioqatigiissitami sulinitsinni ilinniarfeqarfiit ilanngunnissaat. Taamaasilluta kinguaariit inuusunnerusut nunatta iluani nunarsuarmilu saammaateqatigiinnissap ingerlaasiinik ilaatissinnaavavut, taamaasillutik aamma inuusuttut oqaluttuarisaanermi pissutsinut pisunullu taakkualu inuiaqatigiinni sunniutaannut annermik ilisimasaqarnerulissapput, Saammaateqatigiinnissamut Isumalioqatigiissitami siulittaasup tullia, Dorthe Katrine Olsen taama oqarpoq.

Atuaruk: Naalagaaffeqatigiinneq oqallisigineqalersoq

Saammateqatigiinnissamut Isumalioqatigiissitap suliamini unammillernartut nalaattagaasa ilaannik paasinninnissamut, ilinniartut ilisimasaqalernissaat ilinniartitsinerup siunertaraa.

- Una ilinniartitsineq saammateqateqatigiititsisussaatut atunngikkaluartoq, atuartut saammateqatigiinneq pillugu pitsaanerusumik inissisimalernissaat siunertaavoq, ilinniartitsisunut malittarisassami allaqqavoq.

Assersuutigalugu atuartut qallunaatoornermi ''Nammineq tunuliaquttamillu saammateqatigiinneq, nammineq oqaluttuarisaanermik saammaateqatigiinneq, kalaallit inuiaqatigiit akornanni aamma kinguaariit akornanni saammaateqatigiinneq'' ilinniassavaat.

Hitlerip Mein Kampfiliaa atuassagaat
Saammaateqatigiinnissamik suliaqarneq paasiniarlugu atuartut allaaserisat arlallit atuarlugillu oqaluuserissavaat, ilaatigut Dansk Folkepartip siulittaasorisimasaata Pia Kjærsgaardip oqalugiaataa, Adolf Hitlerip atuakkiaanit Mein Kampfimi tigulaagaq aamma Niels Peter Aggerip aviisimi allaatigisaa; "Undskyld Grønland"-

Atuartut faagimi inuiaqatigiilerinermi siunissaq pillugu isumaqalernissamik piginnaalersillugu ilisimasaqalissapput, faagimut ilitsersuummi tamanna allaqqavoq.

Nunasiaateqarneq atorunnaarsikkiartorneqarpa?
Ilaatigut "atuartut nunasiaateqarnertut inissisimanerup atorunnaarsikkiartorneqarnera naliliitinneqarnissaat pingaaruteqarpoq"

- Inuit systemimit aqqutalugineqartutut misiginerat, ataasiakkaat ilaguutiinnalerlutik aamma nikanartunngornerinik kinguneqartitsisimanera ... Paasissallugu pingaaruteqarpoq. Inuit toqqaannartumik toqqaannanngitsumillu politikkikkut immikkoortinneqarsimanerat, suli ullumikkut kalaallini inuiaqatigiinni sunniuteqarpoq, ilinniartitsisumut ilitsersuummi allaqqavoq.

Atuaruk: Isumalioqatigiissitaq maanna siulittaasqalerpoq

Paasissutissiineq naapertorlugu ilinniartitsisut atuartitsissutissatut pilersaarutit tigulluareersimavaat.

- Ajunngilluinnarpoq, qulequttanik sammisaqaraangatta assersuutigalugu nunanut allanut tunngasunik, maanna atassutilerneqarsinnaalermata Kalaallit Nunaanni pisunut ingerlaatsinullu imaluunniit Kalaallit Nunaata oqaluttuarisaaneranut attuumassuteqartunut, Sisimiuni GUX-imi tuluttut ilinniartitsisoq, Louise Kyhl issuarneqarpoq.