Saagut peerneqassapput: Naalakkersuisut imigassamut inatsimmik allannguinissamut piareersimasut
Imigassamut inatsisip allanngortinneqarnissaanut Demokraatit piumasaqarnertik akueritilerpasippaat
Imigassat toqqorterniarlugit saagulersuineq assortuussutaangaatsiartoq atorunnaarsinneqalerpoq, imigassamillu aalakoornartulimmik pisiniarneq nalunaaqutaq 09.00-mit 20.00 tungaanut pisinnaalissaaq, ulluni tamani sapaat kisimi pinnagu. Taakku marluk allannguutit, partiit Naalakkersuisut tapertaasa akueritinniarpasippaat.
Demokraatit inatsisip allanngortinneqarnissaanut siunnersuutinik sisamanik saqqummiussinikuupput, taakkulu maanna Naalakkersuisut tapersersulerpaat. Naalakkersuisunit Demokraatinut akissuteqaammi tamanna atuarneqarsinnaavoq.
Imigassamut inatsimmi pisiniarfinni assersuineq oqaluuserineqarnerpaat ilagaat. Tamannalu maanna atorunnaarsinneqassasoq, Naalakkersuisut siumut kalerriuteqarput.
- Naalakkersuisut assiaqusersuineq inatsimmik tunngavissalernagu pisiniarfiit kaammattorusuppai namminneq kajumissusertik naapertorlugu imigassat aalakoornartortallit tulluartumik inissititeqqullugit taamaasilluni ulluinnarni pisiarisartakkanut immikkoortillugit, akissuteqaammi tamanna allaqqavoq.
Naalakkersuisut aamma ammasarfiit sivitsorneqarnissaannut kissaateqarneq akueriniarpaat.
- Naalakkersuisut takusinnaavaat imigassamik aalakoornartortalinnik matulernerata nalaani siuleriiaartut amerlasinnaanerat tamannalu ilaqutariinnut akornutaasinnaasoq, akissuteqaammi tamanna atuarneqarsinnaavoq.
- Ammasarfiit ulluinnarni arfininngornermilu tallineratigut Naalakkersuisut matulernerani siuleriaartut pinngitsoortinnissaanut kissaat akuerisinnaavaat.
Imigassamik piseqqusaaruteqarnissamut inerteqquteqarneq Naalakkersuisut atorunnaarsinnissaanut aamma piareersimapput.
- Naalakkersuisut paasivaat najukkami inuussutissarsiutillit nunanit allanit tunisassiortunit sanilliullugit pitsaannginnerusumik inissisimasut.
- Tamanna tunngavigalugu imigassat aalakoornartortallit pillugit pilerisaarutit suulluunniit inerteqqutaanerata atorunnaarsinnissaa imaluunniit allamik taama sakkortutiginngitsigisumik taarserneqarnissaanut Naalakkersuisut siunnersuut akuersissutigineqarnissaanut innersuussipput. Naalakkersuisut neriuutigaat siunnersuut Inatsisartut ataatsimiititaliamut peqqissaartumik suliassanngortissagaat.
Inuusuttut 18-it inorlugit ukiullit aamma cafémi nalunaaqutaq 23.00 tungaanut smoothietorsinnaalissapput, tassani imigassamik aamma nioqquteqartoqaraluarpalluunniit – naak anaana aamma ataata ilaanngikkarluartoq.
Naalakkersuisut nassueruteqarnerat Demokraatinit naammagisimaarneqarluarpoq.
- Partiitut tapertaasutut pissagutta, taava naalakkersuinermi suliatsinni pingaarutilinni nassueruteqartoqartariaqarpoq, tamannalu takussutissartaraa, Justus Hansen (D) Sermitsiaq.AG-mut oqarpoq.
- Naalakkersuisut siunissami suleqatiginissaannut tamanna isumalluarnarpoq.