Saaffiginnittarfik nutaaq ima ingerlanneqarpoq

Oqarasuaatikkut politiinut saaffiginnittarfik Nuummi ullumi atoqqaartinneqarpoq.

Taamaalilluni najukkami politeeqarfik imaluunniit politeeq oqaloqatigineqartuaannarunnaarluni, nuna tamakkerlugu saaffiginnittarfeqalerpoq.

Oqarasuaat 70 14 48-mut sianeraanni, Nuummi saaffiginnittarfimmi sulisup saaffiginnissut akisassavaa.

Taassumalu kingorna saaffiginninnermut tunngatillugu politiit qanoq iliussanersut taakku naliliissapput, aamma kiap isumagissaneraa. Assersuutigalugu politiit najukkamiittut suliamut aggertinneqarsinnaapput.

Pitsaanerusoq sukkanerusorlu
Ulluinnarni ulluunerani saaffiginnittarfiup Nuuk isumagisassavaa, kisianni ulluinnarni nalunaaqutaq 16.00 tikippagu nalunaaqutaq 08.00 tungaanut weekendit ilanngullugit, nuna tamakkerlugu - Tasiilamit, Upernavimmit imaluunniit Narsarsuarmit sianeraluaruit Nuummit akineqartassaatit.

- Saaffiginnittarfik Kalaallit Nunaanni Politiit pitsaanerusumik sukkanerusumillu suliassat naammassisalernissaannut iluaqutaassasoq neriuutaavoq, Jens Henrik Højbjerg oqarpoq, taanna qallunaat kalaallillu naalagaaffiup politiivini pisortaavoq.

Saaffiginnittarfik politiit suliakkiisarfianut (KSN) atassuteqassaaq, taanna ulluinnarni pisut aamma naatsorsuutiginngisamik pisut annertuunut ataqatigiissaarisinnaavoq.

Atorfinitsitsinerit
Nuna tamakkerlugu saaffiginnittarfimmi pigaartut pisortat, ikiortit aamma sullissinermut ikiortit, tamarmik immikkut ilinniartinneqarsimasut taanna suliarisassavaat.

Saaffiginnittarfiup atuutilerneranut atatillugu inuit arfineq-pingasut atorfinitsinneqarsimapput - tamarmik sullissinermut ikiortitut, taakku politiit avataanit pissarsiarineqarput.