qinersineq
S sinnerlugu qinigassanngortittoq: Ilulissani takornarialerinermut ilinniarfeqalerli
Takornarialerinermut ilinniarfik Qaqortumit Ilulissanut nuunneqartariaqartoq Inatsisartunut Siumut sinnerlugu qinigassanngortittoq Bernhardt Olsen oqarpoq
Nunatsinni inuussutissarsiutini takornarialerineq annertusarneqarnissaa Demokraatit sinnerlugit Inatsisartunut qinigassanngortittup Randi Vestergaard Evaldsenip siunnersuutai Sermitsiaq.AG-mit marlunngornermi allaaserineqarput.
Siumut siunnerlugu Inatsisartunut qinigassanngortittup Bernhardt Olsenip takornarialerineq pillugu aamma qineqqusaaruteqarpoq.
- Takornarialerinermut ilinniarfik Qaqortumiittoq Ilulissanut nuunneqartariaqarpoq. Atuartut takornarialerinissaminnut piumassuseqarnerussapput, Ilulissanimi takornarialerinissamut periarfissaasut amerlanerupput, Bernhardt Olsen Ilulissani najugaqartoq oqarpoq.
Ilinniagaqarneq
Sukkanerpaaq atorlugu Ilulissanut ilinniarfik nuunneqassasoq isumaqarpoq. Ilulissani periarfissarpassuaqartoq isumaqarpoq, Qeqertarsuup Tunuani illoqarfiit aamma periarfissaqarluartut oqarpoq.
- Takornarialerisoqarneranut tulluussarlugu ilinniartitsisoqartassaaq. Ilinniarneq novembarimi aallartinneqartalersinnaavoq aggustip naanerata tungaanut ingerlasassalluni, Bernhardt Olsen oqarpoq.
- Ilinniarnerup iluani assigiinngitsut ilinniarneqarsinnaassapput. Soorlu asimukartitsinerit, umiatsiamik angallassinerit, qimussernerit, qajartitsinerit, sisorartitsinerit, eqqumiitsulianik tuniniaanerit kiisalu takornarissanik isumaginninnerit.
Nunani allani takornarialerinermik misilittagalinnik suleqateqartoqartariaqartoq Bernhardt Olsen isumaqarpoq.
Islandimi takornarialerineq ineriartupiloorpoq ukiuni kingullerni. Takornarialerineq Islandimut aningaasatigut isaatitsiffiunersaavoq - ilaatigut aamma Berlinske allappoq Islandimi takornarissat 1 millionit tikinnissaat naatsorsuutigineqartoq. Ukioq 2000-mit sanilliullugu pingasoriaammik amerlaneruvoq.
Takornarissat 71.000-it Nunatsinnut tikipput 2013-mi.