økonomi

S-politikeri: Momsip eqqunneqarnera qanoq akeqassava?

Suka Frederiksenip arlalinnik apeqquteqareersorlu Aningaasaqarnermut Naalakkersuisoqarfik naatsorsuutinik misissuisimapput

Suka K. Frederiksen

Inatsisartut Aningaasaqarnermut Akileraartarnermullu Ataatsimiititaliaani ilaasortap, Suka Frederiksenip, nunani allanitut nioqqutissat eqqunneqarneranut akitsuut eqqunneqassappat suut iluaqutaallutillu ajoqutaasinnaanersut paaserusuppaa.

Atuaruk: Suliffeqarfiit akileraarutaat Naalakkersuisut apparujussuarnissaat kissaatigaat

Moms 5-10 procenti eqqunneqassagaluarpat, Nunatta karsia 270-t aamma 540 millionit akornanni isertitaqarsinnaassasoq, Frederiksen paasitinneqarpoq.

Naatsorsornissaa ajornartoq
Kisianni naatsorsuinermi nalorninartorpassuaqarpoq, Aningaasaqarnermut Naalakkersuisoqarfimmi atorfilittat oqarput.

- Apeqqutigineqartoq erseqqissumik akissuteqarfigineqarsinnaanngilaq nioqqutissanik eqqussuinermi akitsuusersueriaatsit ilusersorneqarneri apeqqutaasussaammata.

Kisianni Danmarkimisut iliortoqaraluarpat, akitsuutinit isertinneqartartut nunap tunisassiaasa ataatsimut nalingisa 9,5 procentiisa missaanik annertussuseqartarlutik, Kalaallit Nunaanni assingusumik aaqqissuussinikkut akitsuutip 5 procentimut inissinneratigut isertitassat 270 millionit koruunit missaaniissagaluarput, 10 procentimillu inissinneqarpata isertitassat 540 millionit koruunit missaaniissagaluarlutik.

Taakku procentit marluk Suka Frederiksenip apeqqutaani ilaapput.

Atuaruk: Akileraarusiineq pillugu inatsisissap allanngortinneranut nangaassuteqarneq

Politikeri aamma naalakkersuisoqarfimmit momsip eqqunneqarnerani iluaqutissarpassuarnik ajoqutissarpassuarnillu paasitinneqarpoq.

- Akitsuuseeriaatsimik eqqussineq pisortanut namminersortunullu annertuumik allaffissornermik pilersitsissaaq, Randi Vestergaard Evaldsen allappoq.

Akissarsiat pisissutaasinnaasut ikinnerusut
Taassuma saniatigut akitsuusersueqqinnerit nunami akinut qaffatsitsissapput, akitsuusersuinerit kingulliit assigalugit.

Akitsuusersuisoqalerpallu akissarsiat ilanngassavaat.

- Akileraarutit akitsuutilluunniit aqqutigalugit oqilisaasoqanngippat akitsuusersuisalerneq akissarsiat pisissutaasinnaasut appariarnerannik taamaasillunilu aningaasat atuinissamut atugassat ikileriarneranik kinguneqassaaq.

Atuaruk: Siumup immikkoortortaqarfia akitsuutinut akerliliivoq

Kisianni aamma nunap karsiani millionit amigaatigineqartut saniatigut iluaqutissartaqassaaq, Randi Vestergaard Evaldsenip allaffeqarfianit oqaatiginieqarpoq.

- Akitsuusersuisalernikkut qularnanngitsumik nunatsinni namminermi/najukkani ataasiakkaanni aningaasanik kaaviiaartitsisarneq annertusineqarsinnaavoq, inuit ataasiakkaat nunanit allanit pisiarisartagaat akitsuuserneqartalissammata, taamaasilluni inuit ataasiakkaat namminneerlutik nunanit allanit pisiniartarnerat ajornarnerulaalersussaassammat.

Akitsuutinut akerliusoq
Siumumeersup apeqquteqaataani akitsuutinik eqqusserusunnersoq eqqusserusunnginnersorluunniit takuneqarsinnaanngilaq, kisianni siornatigut akitsuutinut akerliunikuuvoq.

Suka Frederiksen (S) septembarimi 2015-imi aningaasaqarnermut naalakkersuisuusimasup Anda Uldumip (D) akitsuusersuiniarneranut akerliulluni tamanut nalunaaruteqarnikuuvoq.

Atuaruk: Akitsuusiinissat Siumumit aalassassimaarutigineqarput

Powered by Labrador CMS