Katsorsaaneq
S-politikeri: Meeqqanut inuusuttunullu katsorsaavimmik pilersitsigitsi
Kommuneqarfik Sermersuumi kommunalvestyrelsimut ilaasortaq Peter Davidsen (S), inuusuttuaqqanut imigassamik aamma ikiaroornartumik atuisunut katsorsaaveqassasoq isumaqarpoq
Qaammammi kingullermi meeqqat illersuisuata Aviâja Egede Lyngep, KNR-imi radiokkut aallakaatitassiami 'Oqalliffimmi' oqaatigaa, meeqqat 10-12-it akornanni ukiullit hashimik pujortartartut ilisimasaqarfigalugit.
Taassuma oqaatigaa, meeqqanut inuusuttunullu atornerluisooreersunut katsorsaavinnik qulakkeerinnittoqassasoq.
Atuaruk: Meeqqat illersuisuat aarlerisaarivoq: Meeqqat qulinik ukiullit ikiaaroortarput
Meeqqanut inuusuttunullu katsorsaaneq
Aviâja Egede Lynge Kommuneqarfik Sermersuumi kommunalvestyrelsimi ilaasortamit, Peter Davidsenimit (S) taperserneqarpoq.
Kommuneqarfik Sermersooq inuusuttunut 13-17-illu akornanni ukiulinnut atornerluisunut siunnersortimik, ikiaroornartunik, imigassamik aamma naamaarnermik katsorsaasumik atorfinitsitsisariaqartoq, taanna isumaqarpoq.
- Taamatut Kommuneqarfik Sermersuup ataani inuusuttuaqqanut katsorsaaveqarnissaa pisariaqarsoraara ilaatigut tulluarsorinnginnakku pineqartut inersimasut akornanni katsorsarneqarnissaat, tassami inuusuttuaqqanut 18-it ukiullit ataallugit suli angajoqqaat akisussaasuummata, taanna tusagassiuutinut nalunaarummi allappoq.
Atuaruk: Meeqqat allaat 11-iinnarnik ukiullit hashitortarput
Suliniutinik aallartitsisoqarli
Peter Davidsenip tusarsimavaa, inuusuttuaqqat meeqqat atuarfiani atuartut hashimik atuisartut.
- Taamaattumik inuusuttuaqqat akornanni aanngaajaarniutinik atuineq qanoq annertutiginersoq sukumiisumik qulaajarneqartariaqarpoq iliuuseqarfigineqarlunilu, Sermersuumi politikeri taama oqarpoq.