Pituffik
S: Pituffimmi suleriaatsip allanngortinneqarnerani oqaatsit aporfiussapput
Pituffimmi suleriaatsip allanngortinneqarnerani kalaallinut ilinniartunut sulisunullu eqquisinnaasoq folketingimi ilaasortap Doris Jakobsenip Siumumeersup oqaatigaa
Suliffeqarfik Exelis Services kiffartuussinermut isumaqatigiissutaa 2014-mi oktobarimi atsioqatigiiffigineqartoq suleriaatsimik allannguisinnaavoq.
Tamanna Siumup folketingimi ilaasortaatitaata Doris Jakobsenip ernumagaa.
Folketingip Kalaallit Nunaannut ataatsimiititaliaata Pituffimmeereernerata kingorna tamanna ernumagilerpaa.
- Greenland Contractorsimi atorfeqartumit ilisimatinneqarpugut Pituffimmi sulinermi oqaatsit atorneqartut Exelis Servicesip tuluttuunngorlugu allanngortissinnaagaa. Taamaattoqassappat ilinniartut atorfeqartullu suliffimmut piukkunnarunnaassapput, Siumumi politikkeri oqarpoq. Aamma tusarsimavaa Pituffimmi sulisorineqartut ikilineqassasut.
Isertitat allanngorannginnissaat
Pituffimmit isertissutaasartut allanngorarpallaartut Doris Jakobsen oqarpoq.
- Kalaallit Nunaata Pituffimmi isertissutigisartagaat aalajangersuusimasariaqarput. Nunani allani USA-p radareqarfeqarnerani akiliuteqartartoq nalunngilarput. Kalaallit Nunaannut aamma aningaasartuutigineqartariaqarpoq, Jakobsen oqarpoq.
Exelis Services: Suleriaatsit atuutiinnarneqassapput
Exelis Servicesip oqaaseqartartuaq Kim Ruberg Ritzauimut tallimanngornermi ima ilaatigut oqarpoq:
- Danskit aningaasarsiaritittagaannik akissarsiaqartinneqassapput sulinermilu inatsisit aamma taamaaginnassapput.
- Ilinniartunik sullissinerit atuuttut ingerlatiinnarneqassapput. Kiffartuussinissamut isumaqatigiissut maannakkut atuuttoq malillugu sulisoqassaaq. Suliffeqarfiuvugut ajunngitsumik siunertaqartut, oqaaseqartartoq oqarpoq.
Sulinermi oqaatsit suut atorneqartassanersut ilaatigut Sermitsiaq.AG-mit Exelis Servicesimut sisamanngormat apeqqutiginiarneqaraluarpoq iluatsinngitsumik.